Birneshe kún buryn Resei mobilizatsiia jariialaǵan soń, Qazaqstan-Resei shekarasynda birneshe shaqyrymǵa sozylǵan kólik keptelisi bolǵan edi. Onymen qoimai osy jaǵdaidy paidalanǵandar túrli kásip órkendetken. Resei jaqtan azyq-túlik pen benzindi qymbat baǵada satsa, bizdiń elde taksi júrgizýshileri paidaǵa kenelgen. Alaida, 2 qazanda jaǵdai ózgerip, keptelis basylǵan, - dep habarlaidy Tengrinews.kz agenttigi "Moi gorod" basylymyna silteme jasap.
Basylym málimetinshe, "Syrym" (Resei jaǵynan "Mashtakovo") shekarasynda Qazaqstan jaǵynan jeti shaqyrymǵa sozylǵan júk kólikteriniń kezegi 2 shaqyrymǵa deiin qysqarypty. Kezek kútken jeńil avtokólikter múldem bolmaǵan. Jol jieginde qoqys kóp. Bos bótelkeler men sómkelerdi jel ushyryp jatyr.
Taksi júrgizýshileriniń de qarasy azaiypty. Shekaradan halyq aǵylǵan alǵashqy kúnderi taksi júrgizýshileri beketten Oralǵa jetý úshin 2000 rýbl (16 000 teńgeden sál asady) qarajat suraǵan. Al qazir baǵa eki ese tómendegen.
Shekarada Resei jaǵynan tranzittik júk kólikteri men Ózbekstan azamattarynyń otyz shaqty jeńil kóligi ǵana boldy. 29 qyrkúiekte BQO-ǵa kelip, 2 qazanda dosyn kútip otyrǵan reseilik jaǵdaidy túsindirdi.
"28 qyrkúiekte mobilizatsiia boiynsha shaqyrtý alǵandar eshqaida kete almaidy. Al qalǵandary shekaradan kedergisiz ótip jatyr", – dedi er adam.
