Foto: Akorda.kz
Táýelsizdik saraiynda Qazaqstan Respýblikasynyń Prezidenti Qasym-Jomart Toqaevty saltanatty ulyqtaý rásimi ótti, dep habarlaidy "Ult aqparat" Aqordaǵa silteme jasap.
Memlekettik Tý men Prezident Bairaǵy, sondai-aq Qazaqstan Respýblikasynyń Konstitýtsiiasy Táýelsizdik saraiynyń Úlken zalyna ákelingen soń, Qazaqstan Respýblikasynyń Prezidenti minberge kóterildi.
Konstitýtsiianyń 42-babyna sáikes, Qasym-Jomart Toqaev halyqqa ant berdi.
«Qazaqstan halqyna adal qyzmet etýge, Qazaqstan Respýblikasynyń Konstitýtsiiasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblikasy Prezidentiniń ózime júktelgen mártebeli mindetin adal atqarýǵa saltanatty túrde ant etemin!» - dedi ol.
Sailanǵan Qazaqstan Prezidentiniń qyzmetke kirisý qurmetine orai Memlekettik ánuran oinalyp, zeńbirekterden 21 ret oq atyldy. Al «Aqorda» rezidentsiiasynyń ústinde Memlekettik Tý kóterildi.
Ortalyq sailaý komissiiasynyń tóraǵasy Nurlan Ábdirov Qasym-Jomart Toqaevqa Qazaqstan Respýblikasy Prezidentiniń kýáligin tapsyrdy.
Memleket basshysy saltanatty ulyqtaý rásiminde sóilegen sózinde ózine zor senim artqan barsha otandasyna alǵys aitty.
– Halyqtyń senimi – eń qundy nárse. Sailaý nátijesin halqymyzdyń saiasi baǵdaryma – baǵasy, aldaǵy josparyma – batasy dep qabyldaimyn. Halqynyń qoldaýyna ie bolyp, el tizginin ustaý – er azamat úshin eń biik mártebe ári orasan zor jaýapkershilik. Aldaǵy 7 jyldy búgingi býynnyń jáne keleshek urpaqtyń aldyndaǵy boryshymdy óteýge berilgen biregei múmkindik dep bilemin. Qazaqta «amanat» degen asyl uǵym bar. Halqymnyń senimi – maǵan amanat. Osy amanatqa adal bolý – men úshin qasietti paryz. El úmitin aqtap, Qazaqstandy órkendegen, baqýatty memleketke ainaldyrý úshin qolymnan kelgenniń bárin jasaimyn, – dedi Qasym-Jomart Toqaev.
Sondai-aq, Prezident aldaǵy qyzmetiniń birqatar negizgi baǵytyn atap ótti. Memleket basshysynyń aitýynsha, shynaiy zań ústemdigin qamtamasyz etpei, ádiletti ári naryqtyq ekonomikany qurý, jeke menshikti qorǵaý, básekelestikti damytý, sybailas jemqorlyqty joiý múmkin emes. Elimiz damý jolynda, negizinen, óz kúshine senedi. Sonymen qatar shetelden tikelei investitsiia tarta otyryp, túrli saladaǵy halyqaralyq yntymaqtastyqty belsendi túrde damytady.
Qasym-Jomart Toqaev Qazaqstan óz ulttyq múddesin qorǵaýǵa baǵyttalǵan teńgerimdi jáne konstrýktivti syrtqy saiasatyn júzege asyra beretinin jetkizdi. Saiasi jańǵyrý úderisi josparly túrde jalǵasady.
Ulyqtaý rásimine Qazaqstannyń Tuńǵysh Prezidenti Nursultan Nazarbaev, Qazaqstan Respýblikasynyń Parlamenti depýtattary, Úkimet músheleri, Joǵarǵy sot sýdialary, Konstitýtsiialyq Keńestiń músheleri, Prezident Ákimshiligi men Premer-Ministr Keńsesiniń ókilderi, ortalyq memlekettik basqarý organdarynyń basshylary, Ortalyq sailaý komissiiasy men Qazaqstan Halqy Assambleiasynyń músheleri, dini konfessiia ókilderi, oblystar men Astana, Almaty jáne Shymkent qalalarynyń ákimderi, Qazaqstandaǵy diplomatiialyq ókildikterdiń basshylary, prezidenttikke úmitker bolǵandar, saiasi partiialardyń basshylyǵy, Respýblikalyq jáne aimaqtyq qoǵamdyq shtabtardyń músheleri, qoǵamdyq uiymdardyń jáne buqaralyq aqparat quraldarynyń ókilderi, isker toptar ókilderi, kórnekti ǵalymdar, mádeniet jáne óner qairatkerleri, jastar uiymdarynyń jetekshileri qatysty.
Qazaqstan Prezidenti Qasym-Jomart Toqaevtyń sóilegen sóziniń tolyq mátinimen myna silteme arqyly tanysýǵa bolady.
