Qazaqstan Prezidenti Túrkistan qalasyn damytý jóninde keńes ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Jiyn barysynda Memleket basshysyna Túrkistan qalasyn damytýdyń jospary men perspektivalary jóninde málimdelip, oblys ortalyǵyn Shymkent qalasynan Túrkistan qalasyna kóshirýge qatysty tapsyrmalardyń oryndalýy týraly baiandaldy.
«Elimizde jańadan Túrkistan oblysynyń paida bolǵany barshaǵa málim. Bul oryndy sheshim dep sanaimyn. Oblys ortalyǵy endi Túrkistan qalasyna kóshedi. Bul - barlyq jaǵynan da kúrdeli úderis», - dedi Qazaqstan Prezidenti.
Elbasy Qazaqstan halqy úshin de, búkil túrki álemi úshin de Túrkistan qalasynyń tarihi ári rýhani máni zor ekenine airyqsha toqtaldy.
«Bul - túrki halyqtarynyń kieli mekeni. Sondyqtan munda jurt kóp keledi. Bul jerde kóptegen tanymal tulǵalar jerlengen», - dedi Nursultan Nazarbaev.
Keńeste Premer-Ministrdiń birinshi orynbasary A.Maminniń Túrkistan qalasynyń aýmaqtyq damý tujyrymdamasy jónindegi baiandamasy jáne Túrkistan oblysynyń ákimi J.Túimebaevtyń ákimshilik-aýmaqtyq basqarý organdaryn jańa oblys ortalyǵyna kóshirý barysy jónindegi baiandamasy tyńdaldy.
Atap aitqanda, Qazaqstan Prezidentine infraqurylymdyq jáne áleýmettik nysandar salý jospary, sondai-aq qalany energiiamen jáne sýmen qamtamasyz etýge qatysty usynylǵan sheshimder jóninde egjei-tegjeili málimet berildi.
Jiyn qorytyndysy boiynsha Úkimetke jáne oblys basshylyǵyna birqatar naqty tapsyrma júkteldi.
.jpeg)