29 tamyz kúni Qazaqstan aýmaǵynda qurylǵan Halyqaralyq tómen baiytylǵan ýran bankiniń resmi ashylýy ótedi, dep habarlaidy QazAqparat.
Bul týraly QR Parlamenti Senatynyń Tóraǵasy Qasym-Jomart Toqaev Astanada ótip jatqan Pagýosh ǵalymdar qozǵalysynyń 62-shi konferentsiiasynda málim etti.
Eske sala ketsek, 29 tamyzdy BUU iadrolyq synaqtarǵa qarsy kúres kúni dep belgilegen.
«Biz 2005 jyly Semeide qol qoiylǵan Ortalyq Aziiada iadrolyq qarýdan azat aimaq qurý týraly shartty iske asyrý baǵytynda belsendi jumystar júrgizýdemiz. Qazaqstan aýmaǵynda MAGATE Halyqaralyq tómen baiytylǵan ýran bankiniń qurylýy iadrolyq qarýdy taratpaýdy nyǵaitýǵa qosqan qomaqty úles bolyp tabylady. Onyń ashylýy 29 tamyz kúni Memleket basshysynyń qatysýymen ótedi», - dedi Senat spikeri Pagýosh ǵalymdar qozǵalysy konferentsiiasynyń ashylýynda.
Qasym-Jomart Toqaev Qazaqstannyń táýelsizdikke qol jetkizgen sátten bastap, ózine alǵan halyqaralyq mindettemelerdi múltiksiz oryndap, iadrolyq qaýipsizdikti qamtamasyz etý men men iadrolyq qarýdy taratpaý isine eleýli úles qosyp kele jatqanyn atap ótti. Sondyqtan, álemdik qaýymdastyq Qazaqstandy iadrolyq qarýǵa qarsy qozǵalystyń kóshbasshysy dep tanidy.
«Barsha adamzattyń beibit ómir súrýi men turaqty bolashaǵy úshin kúres jolynda Qazaqstan Respýblikasynyń irgesin qalaǵan Prezident Nursultan Nazarbaev qosqan úlestiń tarihi mańyzy zor. Memleket basshysynyń 1991 jyly Semei iadrolyq poligonyn jabý men iadrolyq qarýdyń qýaty jaǵynan álemdegi tórtinshi arsenalynan bas tartý týraly sheshimderi jahandyq qaýipsizdikke qarai jasaǵan jaýapty qadamnyń teńdessiz úlgisi boldy», - dedi ol.
Sonymen birge, Q.Toqaev Qazaqstannyń iadrolyq qarýdan bas tartý jáne ony taratpaý, iadrolyq qaýipsizdik jónindegi barlyq halyqaralyq sharttardyń qatysýshysy ekenin atap ótti.
«Elimizdiń bastamasymen BUU Bas Assambleiasy Semei poligony jabylǵan kún - 29 tamyzdy Halyqaralyq iadrolyq synaqtarǵa qarsy kúres kúni jáne 26 qyrkúiekti Halyqaralyq iadrolyq qarýdy túbegeili joiý úshin kúres kúni dep jariialady. Qazaqstannyń bastamasymen BUU Bas Assambleiasynyń 2015 jyly jeltoqsanda qabyldaǵan Iadrolyq qarýdan azat álemge qol jetkizý jónindegi Jalpyǵa ortaq deklaratsiiasyn qabyldady», - dep eske saldy Q.Toqaev.
Eske sala ketsek, 25-29 tamyz kúnderi Qazaqstan astanasynda ǵylym men jahandyq problemalardy talqylaityn Pagýosh ǵalymdar qozǵalysynyń 62-shi konferentsiiasy ótedi.
