Qazaqstan Prezidenti Paralimpiadalyq jattyǵý ortalyǵyna bardy

Qazaqstan Prezidenti Qasym-Jomart Toqaev Paralimpiadalyq jattyǵý ortalyǵyna bardy, dep habarlaidy "Ult aqparat" Aqordaǵa silteme jasap.

Memleket basshysyna halyqaralyq qoljetimdi standarttar boiynsha qaita jańǵyrtylǵan, múmkindigi shekteýli jandarǵa tolyqtai yńǵailastyrylǵan jattyǵý, oiyn zaldary, júgirý jolaǵy, jekpe-jek jáne paýerlifting aýmaǵy bar paralimpiada ortalyǵy tanystyryldy.

Qasym-Jomart Toqaev paralimpiadalyq oiyndardy memleket qoldaitynyn ári halyqaralyq arenalardaǵy bizdiń sportshylarymyzdyń jetistikterin maqtan tutyp, joǵary baǵalaitynyn aitty. Sonymen qatar, Tokioda ótetin Paralimpiadalyq oiyndarda joǵary deńgeide óner kórsetý úshin uiymdastyrý jáne qarjylyq qoldaý kórsetiletinin jetkizdi.  

– Osy ortalyqtyń arqasynda elordamyzdaǵy múmkindigi shekteýli jandarǵa sportpen shuǵyldaný tegin bolyp otyr. Elimizde 680 myńǵa jýyq ártúrli deńgeidegi múmkindigi shekteýli jan bar. Qolymyzdaǵy derekterge qaraǵanda sol azamattardyń 3 paiyzy ǵana belsendi túrde sportpen ainalysady eken. Bul jaǵdaidy ózgertý úshin jumys istep jatyrmyz. Búgin túske deiin eńbek jáne jumyspen qamtý boiynsha keńes ótkizdim. Sol jiynda múmkindigi shekteýli jandardyń jumysqa ornalasýyn jiti nazarda ustaý kerektigi aityldy. Bul – úlken áleýmettik mindet. Erekshe qajettiligi bar adamdardyń tolyqqandy ómir súrýine bar kúshigimizdi salýymyz kerek, – dedi Qazaqstan Prezidenti.

Kezdesý sońynda múmkindigi shekteýli sportshylar óz ónerlerin kórsetti.