Memleket basshysy Qasym-Jomart Toqaev pen Qatar Ámiri sheih Támim ben Hamad Ál Táni shaǵyn jáne keńeitilgen quramdaǵy kelissózderden keiin buqaralyq aqparat quraldary ókilderi úshin brifing ótkizdi, dep habarlaidy "Ult aqparat" Aqordanyń resmi saityna silteme jasap.
Prezident kelissózderge mándi de, maǵynaly pikir almasý boldy dep baǵa berdi.
Qasym-Jomart Toqaev Qazaqstan men Qatar arasynda diplomatiialyq qarym-qatynas ornaǵan 30 jyl ishinde eki eldiń yntymaqtastyǵy nyǵaiyp, saýda-ekonomikalyq jáne mádeni-gýmanitarlyq salalardaǵy bailanystar, sondai-aq jahandyq jáne óńirlik qurylymdar aiasyndaǵy is-áreketter damyp kele jatqanyn atap ótti.
– Jalpy, Qatar – biz úshin Taiaý Shyǵystaǵy óte mańyzdy seriktes. Sebebi Doha bizdiń áleýmettik-ekonomikalyq, saiasi reformalarymyzǵa alǵashqylardyń biri bolyp qoldaý kórsetti. Men muny búgin sheih Támimniń ózine de aittym. Onyń ekijaqty yntymaqtastyqty nyǵaitýǵa qosqan úlesin joǵary baǵalaimyz. Halqymyzdyń atynan rizashylyq bildirdim, – dedi Memleket basshysy.
Prezidenttiń aitýynsha, búgingi kelissózder nátijesinde taraptar mańyzdy máselelerdi talqylap, birqatar kelisimge kelgen.
– Qazaqstan men Qatar ekijaqty qarym-qatynastaǵy saýda-ekonomikalyq jáne investitsiialyq yntymaqtastyqqa basa nazar aýdarady. Alaida koronavirýs indeti jáne geosaiasi ahýal áleýetimizdi tolyq paidalanýǵa múmkindik bermedi. Sol sebepti sońǵy jyldary saýda-sattyǵymyz báseńdep ketti. Endigi maqsatymyz – elderimiz arasyndaǵy taýar ainalymyn jandandyrý. Buǵan qolaily jaǵdai jasaldy, – dedi Qasym-Jomart Toqaev.
Qazirgi ýaqytta Qatardyń birneshe kompaniiasy Qazaqstannyń aýyl sharýashylyǵy salasynda tabysty jumys istep jatyr. Olardyń ónimi birqatar memleketke eksporttalady. Sonymen qatar taraptar geologiialyq barlaý, taý-ken ónerkásibi, kólik-logistika, qarjy jáne bank sektoryn damytýǵa ýaǵdalasty. Osyǵan orai búgin birqatar mańyzdy qujattarǵa qol qoiyldy.
Memleket basshysy bul kelisimderdiń qazaq-qatar qatynastarynyń damýyna tyń serpin beretinine senimdi ekenin jetkizdi.
