- 2016 jyldyń sońynda nemese 2017 jyldyń basynda QR Prezidenti Nursultan Nazarbaev Qyrǵyzstan eline memlekettik saparmen barady dep kútilýde. Bul týraly búgin QR Syrtqy ister ministri Erlan Ydyrysov Qyrǵyzstan Respýblikasynyń SIM basshysy Erlan Abdyldaevpen bolǵan kezdesýinde málim etti, dep xabarlaidy QazAqparat.
«Tańerteń bizde Memleket basshysymen mazmundy kezdesý ótti. Nursultan Nazarbaev meniń qyrǵyz áriptesimniń ekijaqty qarym-qatynastar, damý bolashaǵy, aimaqtyq jaǵdaidyń damý kózqarastary jaiyndaǵy pikirin tyńdady. Memleket basshysy Qazaqstan men Qyrǵyzstan qarym-qatynastary ózgelerge úlgi bolýy tiis ekendigin atap ótti jáne eki eldiń saiasi, ekonomikalyq, mádeni-gýmanitarlyq, jastar saiasaty baǵytyndaǵy bailanystardyń keshendi baǵdarlamasyn jasaqtaý qajettigin aitty, - dedi E. Ydyrysov. - Biz Memleket basshysynyń Qyrǵyzstanǵa saparyn talqyladyq. Eki memlekettiń joǵary memlekettik keńesiniń kezekti otyrysyn ótkizý úshin Qazaqstan Prezidentiniń Qyrǵyzstanǵa memlekettik saparyn uiymdastyrýdyń yńǵaily ýaqytyn izdeimiz. Memleket basshysy atap ótkenindei, eń bastysy sapardy sapaly mazmunmen qamtý qajet».
Óz kezeginde Qyrǵyzstan Respýblikasynyń Syrtqy ister ministri Erlan Abdyldaev eki tarap Qazaqstan Prezidentiniń Qyrǵyzstanǵa memlekettik saparyn sapaly uiymdastyrýǵa úlken kúsh salatyndyǵyn málim etti.
«Biz Qazaqstan Prezidenti Nazarbaevtyń memlekettik sapary bolady dep josparlap otyrmyz jáne ony daiyndaýǵa belsendi kúsh salamyz. Menińshe, sapar jyl sońyna deiin nemese kelesi jyldyń birinshi toqsanynda ótedi. Joǵary memleketaralyq keńes otyrysynda óte mańyzdy taqyryptarmen toly bolady. Atap aitqanda, shekarany demarkatsiialaý men rejimin anyqtaý, sonymen qatar bizdiń elderdiń arasyndaǵy qarym-qatynastardyń keshendi baǵdarlamasyn talqylaý. Nursultan Ábishuly eki elderdi barlyq salada jaqyndastyra túsetin baǵdarlamany qoldady», - dedi Qyrǵyzstannyń SIM basshysy.
.jpeg)