Qazaqstan Prezidenti memlekettik nagradalar men syilyqtardy tabystaýǵa arnalǵan saltanatty rásimge qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev saltanatty rásimge qatysýshylardy Táýelsizdik kúnimen quttyqtap, Egemendik elimizdiń baǵa jetpes bailyǵy ekenin aitty.
– Bizdiń býyn Elbasy Nursultan Ábishuly Nazarbaevtyń sarabdal saiasatynyń arqasynda halqymyzdyń asqaq armanyn aqiqatqa ainaldyrdy. Bairaqty babalarymyz bizge ulan-baitaq jerdi mura etip qaldyrdy. Olardyń amanatyna adal bolý – barshamyzdyń kieli paryzymyz. Azattyq úshin alysyp, el úshin janyn pida etken batyrlardyń erligi eshqashan umytylmaidy, – dedi Qazaqstan Prezidenti.
Memleket basshysy 2019 jyldyń elimiz úshin erekshe mańyzdy bolǵanyn atap ótti.
– Biz memlekettiligimizdiń myzǵymastyǵyn jáne demokratiialyq jolmen damitynyn, Elbasy Nursultan Ábishuly Nazarbaevtyń strategiialyq baǵytyn sabaqtastyq dástúrimen jalǵaitynymyzdy dáleldedik. Tuńǵysh Prezident – Elbasynyń baǵa jetpes tájiribesi men bilimi halqymyz úshin asa qajet jáne el igiligi úshin paidalanylady. Asa kórnekti memleket qairatkeri, tarihi masshtabtaǵy tulǵa jáne memleketimizdiń negizin qalaǵan Elbasynyń eren eńbegin qurmetteý – bizdiń paryzymyz, – dedi Qasym-Jomart Toqaev.
Qazaqstan Prezidenti áleýmettik jańǵyrýdyń jańa kezeńin júzege asyrý týraly atap ótti. Bul maqsatqa 3,5 trillion teńge qarjy bólingenin, atalǵan qarajattyń 530 milliard teńgeden astamy balaly jáne az qamtylǵan otbasylardy qoldaýǵa jumsalatynyn aitty.
Qasym-Jomart Toqaev inkliýzivti halyq ekonomikasyn qurýdyń mańyzdylyǵyna nazar aýdaryp, ony damytý nátijesinde elimizdiń árbir azamaty paida tabýy tiis ekenin jetkizdi.
– Bizdiń basty mindetimiz – ár azamattyń turmys sapasyn arttyrý. Sondyqtan memleket áleýmettik mindettemelerdi oryndaýǵa basa mán berip otyr, – dedi Prezident.
Memleket basshysy áleýmettik saiasatty iske asyrý jóninde aita kelip, «halyq únine qulaq asatyn memleket» qurý úshin oryndalatyn mindetterge toqtaldy.
– Memlekettik qurylystyń zamanaýi úlgisi qazirdiń ózinde elitarlyq, ózgeshelik tujyrymdardan alys. Ár sheneýnik ózin halyqtyń bir bólshegi retinde sezinip, halyq úshin jáne halyq arasynda jumys isteýi tiis ekenin umytpaýy qajet. Halyq únine qulaq asatyn memleket degenimiz - biýrokratiiadan múlde ada bolyp, tsifrlandyrý negizinde júzege asyrylatyn barlyq rásimniń ashyqtyǵy, – dedi Qazaqstan Prezidenti.
Qasym-Jomart Toqaev elimiz búkil halyqtyń myqty kúsh-jigeriniń arqasynda biik belesterdi baǵyndyrǵanyn atap ótti. Memleket basshysynyń pikirinshe, el tarihyndaǵy barlyq jetistikter – ár azamattyń eren eńbeginiń nátijesi.
Qazaqstan Prezidenti saltanatty rásimde sóilegen sózinde memlekettik nagrada alǵan azamattardyń sińirgen eńbegin joǵary baǵalady.
Qasym-Jomart Toqaevtyń saltanatty rásimde sóilegen sóziniń tolyq mátinimen myna silteme arqyly tanysýǵa bolady.
