Qazaqstan Prezidenti Qasym-Jomart Toqaev M.V.Lomonosov atyndaǵy Máskeý memlekettik ýniversitetiniń rektory Viktor Sadovnichii men Halyqaralyq yntymaqtastyq jáne ashyq diplomatiia jónindegi Resei qoǵamdyq keńesiniń tóraǵasy Sergei Ordjonikidzeni qabyldady, dep habarlaidy Aqordanyń baspasóz qyzmeti.
Kezdesý barysynda Memleket basshysy Qazaqstan men Resei qarym-qatynastary tatý kórshilik jáne odaqtastyq negizde jemisti damyp kele jatqanyn atap ótti.
- Sizdermen Nur-Sultan qalasynda júzdeskenime qýanyshtymyn. Máskeý memlekettik ýniversitetiniń filialy elordada eki myńynshy jyldary ashyldy. Búginde qazaqstandyq stýdentterge sapaly bilim berip otyrǵan bul oqý orny tabysty jumys isteýde. Jaqynda Máskeýde ótken kelissózder aiasynda Vladimir Pýtinmen bilim salasyndaǵy ekijaqty yntymaqtastyq deńgeiiniń joǵary ekenin atap óttik, sondai-aq ony josparly túrde damytýǵa ýaǵdalastyq, - dedi Qasym-Jomart Toqaev.
Máskeý memlekettik ýniversitetiniń rektory kezdesýge múmkindik týǵyzǵany úshin Qazaqstan Prezidentine alǵys bildirdi. V.Sadovnichii eki eldiń joǵary oqý oryndary arasyndaǵy kóp jyldyq bailanystardyń jemisti bolǵanyn atap ótti.
- Meniń Qazaqstanǵa degen yqylasym erekshe. M.V.Lomonosov atyndaǵy Máskeý memlekettik ýniversitetiniń filialy Qazaqstandy jańǵyrtýdyń jańa kezeńinde suranysqa ie, bilikti kadrlardy daiarlaýǵa zor úles qosqanyn maqtan etemin, - dedi Viktor Sadovnichii.
Sonymen qatar, taraptar eki memleket arasyndaǵy mádeni-gýmanitarlyq yntymaqtastyqtyń ózekti máseleleri jóninde pikir almasty.
