Qazaqstan Prezidenti elshilerden senim gramotalaryn qabyldady, dep habarlaidy "Ult aqparat" Aqordaǵa silteme jasap.
Rásim barysynda Memleket basshysy Nursultan Nazarbaevqa Shvetsiia Koroldiginiń Tótenshe jáne ókiletti elshisi Mats Foier, Kýba Respýblikasynyń Tótenshe jáne ókiletti elshisi Emilio Pevida Pýpo, Úndistan Respýblikasynyń Tótenshe jáne ókiletti elshisi Prabhat Kýmar, Ulybritaniia jáne Soltústik Irlandiia Qurama Koroldiginiń Tótenshe jáne ókiletti elshisi Maikl Djon Gifford senim gramotasyn tapsyrdy.
Memleket basshysy rásimge qatysýshylardy Qazaqstandaǵy diplomatiialyq missiialarynyń resmi túrde bastalýmen quttyqtap, olardyń jaýapty ári mártebeli missiialary elderimiz arasyndaǵy yntymaqtastyqty jan-jaqty damytýǵa septigin tigizetinine senim bildirdi.
– Sizderdiń jumystaryńyz qyzyqty jáne jaýapty kezeńge tuspa-tus kelip otyr. Tehnologiialyq revoliýtsiia jańa syn-qater ákelýmen qatar, kez-kelgen eldiń damýynda serpilis jasaýǵa múmkindik beredi. Sondyqtan Qazaqstan halqyna «Tórtinshi ónerkásiptik revoliýtsiia jaǵdaiyndaǵy damýdyń jańa múmkindikteri» atty Joldaýymdy jariialadym, – dedi Nursultan Nazarbaev.
Qazaqstan Prezidenti álemniń ozyq damyǵan 30 eliniń qataryna qosylýdy jedeldetý úshin qajetti zamanaýi tehnologiialardy paidalanýdyń mańyzdylyǵyn atap ótti.
– Men Joldaýda ekonomikany, áleýmettik salany, sondai-aq memlekettik basqarý isin damytýdyń negizgi baǵyttary boiynsha naqty on mindet qoidym, – dedi Memleket basshysy.
Nursultan Nazarbaev Qazaqstannyń halyqaralyq arenada belsendi pozitsiia ustanyp kele jatqanyn aityp, 2017 jyly Astanada ótken birqatar is-sharanyń nátijelerine nazar aýdardy. Olardyń qatarynda imidjdik turǵydan ǵana emes, sondai-aq ekonomikalyq turǵydan oń áseri bolǵan halyqaralyq «EKSPO-2017» mamandandyrylǵan kórmesin, Shanhai yntymaqtastyq uiymynyń sammiti men Islam yntymaqtastyǵy uiymynyń Ǵylym jáne tehnologiialar jónindegi sammitin ataǵan jón.
– Siriiaaralyq qaqtyǵystardy retteýdiń jańa tetigi retindegi Astana protsesi aiasyndaǵy oń nátijeler bizdiń eldiń derbes jáne beitarap alań retinde tańdalýynyń durystyǵyn kórsetti jáne ony álemdik qoǵamdastyq moiyndady, – dedi Qazaqstan Prezidenti.
Memleket basshysy Qazaqstannyń BUU Qaýipsizdik Keńesiniń tóraǵasy retinde qarastyratyn máselelerine jan-jaqty toqtalyp, jahandyq organnyń barlyq músheleriniń ózara ymyra men konsensýske kelýi úshin belsendi túrde kúsh jumyldyrýdyń mańyzdy ekenin aitty.
– Biz taratpaý rejimin dáiekti túrde nyǵaitý men keńeitý arqyly ǵalamdy iadrolyq qarýdan azat etý, sondai-aq jahandyq soǵys qaýpiniń aldyn alyp, ony tolyq joiý úshin álemdik qoǵamdastyqtyń kúsh-jigerin jumyldyra berýge niettimiz, – dedi Nursultan Nazarbaev.
Qazaqstan Prezidenti Ulybritaniia jáne Soltústik Irlandiia Qurama Koroldiginiń Tótenshe jáne ókiletti elshisine arnaǵan sózinde ekonomikalyq baǵyt elimizdiń sheteldik áriptestermen yntymaqtastyǵynyń basty ózegi bolyp sanalatynyn atap ótti.
– Elderimizdiń yntymaqtastyǵy ózara qurmet pen senimge berik negizdelgen. Búginde Ulybritaniia Qazaqstannyń iri investorlarynyń jáne saýda áriptesteriniń biri bolyp sanalady, – dedi Memleket basshysy.
Nursultan Nazarbaev Shvetsiiamen yntymaqtastyqty damytýǵa airyqsha mán beretinin atap ótip, Shvetsiia Riksdagynyń spikeri Ýrban Alinniń elimizge sapary ótken jyldyń basty oqiǵasyna ainalǵanyn aitty.
Qazaqstan Prezidenti Nursultan Nazarbaev Prabhat Kýmardy Úndistannyń Shanhai yntymaqtastyq uiymynyń tolyq múshesi bolýymen quttyqtap, Qazaqstan Úndistan Respýblikasyn mańyzdy syrtqy saiasi jáne saýda seriktesi retinde qarastyratynyn atap ótti.
– Elderińiz Shanhai yntymaqtastyq uiymynyń jumysyna tyń serpin berip, mártebesin arttyrady dep senemin, – dedi Memleket basshysy.
Sonymen qatar, Nursultan Nazarbaev sońǵy jyldary Qazaqstan-Kýba qarym-qatynastary aitarlyqtai jandanǵanyn atap ótip, elderimizdiń saýda-ekonomikalyq jáne saiasi yntymaqtastyǵyn nyǵaitý úshin naqty jumystardy jalǵastyrý qajet ekenin aitty.
Sońynda Qazaqstan Prezidenti diplomattardy taǵy da quttyqtap, aldaǵy jumystaryna tabys tiledi.
.jpeg)