Qazaqstan Prezidenti Qasym-Jomart Toqaevtyń Shveitsariia Konfederatsiiasyna resmi sapary DDSU Bas direktory Tedros Adhanom Gebreiesýspen kezdesýden bastaldy, dep habarlaidy Aqordanyń baspasóz qyzmeti.
Áńgime barysynda Qazaqstan men DDSU arasyndaǵy yqpaldastyqtyń ózekti máseleleri men perspektivalary talqylandy.
Memleket basshysy Bas direktorǵa elimizdiń pandemiiaǵa qarsy is-qimyldar jóninde qabyldap jatqan sharalary, onyń ishinde qazaqstandyq ǵalymdardyń koronavirýsqa qarsy ázirlegen preparattary men halyqqa jappai vaktsina salý jumystarynyń júrgizilý barysy týraly málimet berdi.
Qasym-Jomart Toqaev Tedros Andhanom Gebreiesýspen buǵan deiingi kezdesýlerin eske ala otyryp, Dúniejúzilik densaýlyq saqtaý uiymy Qazaqstannyń senimdi áriptesi ekenin atap ótti.
— Biz Sizdiń Dúniejúzilik densaýlyq saqtaý uiymyn damytýǵa qosqan úlesińizdi joǵary baǵalaimyz. Ókinishke qarai, álem kúrdeli kezeńdi bastan keshirip jatyr. Qazir koronavirýstiń jańa shtammy — «Omikron» anyqtaldy. Biz indetpen kúreste árdaiym birge bolýymyz kerek, — dedi Prezident.
Qasym-Jomart Toqaev Tedros Adhanom Gebreiesýske ekinshi jańa QazCoVac-P vaktsinasy týraly aitty.
Atalǵan preparat klinikalyq zertteýler fazasyna kandidat vaktsinalar tizimine engizildi.
Prezident qazaqstandyq vaktsinaǵa qoldaý kórsetkeni úshin DDSU basshysyna alǵys aitty.
Memleket basshysy DDSU-nyń vaktsinaǵa teń quqyqty jáne ádil qoljetimdilikti qamtamasyz etýge umtylysyn tolyq qoldaitynyn atap ótip, qazaqstandyq vaktsinany muqtaj elderdiń bárine usynýǵa daiyn ekenin jetkizdi.
Kezdesýde halyqtyń densaýlyǵyn jaqsartý úshin halyqaralyq kúsh-jigerdi jumyldyrý qajet ekeni aityldy.
Osy rette Memleket basshysy densaýlyq saqtaý júiesindegi eki mańyzdy – alǵashqy meditsinalyq-sanitarlyq kómek pen densaýlyq saqtaý salasynda kórsetiletin qyzmetpen halyqty jappai qamtý baǵyttaryn biriktirý týraly usynysyn jetkizdi.
Tedros Andhanom Gebreiesýs Qasym-Jomart Toqaevtyń DDSU-nyń maqsattary men is-qimyldaryna, sonyń ishinde alǵashqy meditsinalyq-sanitarlyq kómekti damytýǵa bailanysty bastamalaryna beiildiligi úshin qoldaý bildirdi.
Uiymnyń Bas direktory Prezidentke óz kezeginde Qasym-Jomart Toqaevqa koronavirýsqa qarsy kúres jóninde qabyldanyp jatqan sharalar, virýstyń jańa shtamdary jáne pandemiianyń odan ári órshý stsenariine qatysty boljamdar týraly málimet berdi.
Tedros Andhanom Gebreiesýs osy ólimge soqtyratyn asa qaýipti indetpen kúreste vaktsina salýdyń asa mańyzdy ekenin atap ótti.
