Qasym-Jomart Toqaev «Aqorda» rezidentsiiasynda oblystardyń jáne Nur-Sultan, Almaty, Shymkent qalalarynyń ákimderimen keńes ótkizdi, dep habarlady Aqordanyń baspasóz qyzmeti.
Prezident oblystar men respýblikalyq mańyzy bar qalalardyń basshylaryna óńirlerdi damytýdyń ózekti máselelerin jedel sheshý jóninde birqatar naqty mindet júktedi.
– El ekonomikasyn damytýdyń negizgi mindeti – halyqtyń turmys sapasyn jaqsartý jáne ishki turaqtylyqty saqtaý. Sondyqtan bárimiz memleket múddesi jolynda eńbek etýge tiispiz, – dedi Memleket basshysy. Qazaqstan Prezidenti biylǵy jyl qoǵamdyq-saiasi oqiǵalarǵa toly bolatynyn atap ótti. Onyń pikirinshe, mereitoilarǵa arnalǵan is-sharanyń barlyǵy iskerlik jáne ataýly sipat alýy tiis.
– Bul ádettegi asta-tók merekeniń biri emes, qaita ideologiialyq turǵydan ilgerileýge jáne qazaqstandyqtardy biriktirýge baǵyttalǵan pragmatikalyq sharalar kesheni bolýy kerek. Prezident Ákimshiligi óńirlerge sharalardyń ideologiialyq maqsat-mindetine qatysty naqty nusqaý beredi, – dedi Prezident.
Qasym-Jomart Toqaev Volonter jylyn sapaly ótkizýdiń mańyzdylyǵyna nazar aýdaryp, ákimderge munyń ministrliktiń nemese Úkimet deńgeiinde ótkiziletin kezekti bir aktsiia emes, elimizdiń búkil aimaqtaryndaǵy azamattardyń basym bóligin qamtityn júieli jumys ekenin eskertti. Bul iste atqarýshy organdar sheshýshi ról atqarýy tiis.
Sonymen qatar Memleket basshysy ákimderge turǵyndar tarapynan túsetin ótinishter men talap-tilekter boiynsha atqarylatyn jumysty kúsheitýdi, jańa formattaǵy ataýly áleýmettik kómekti berý kezinde maqsatty toptarǵa tiimdi túsindirý jumystaryn júrgizýdi, sondai-aq, mindetti áleýmettik meditsinalyq saqtandyrýdy engizýdi tapsyrdy. Prezident halyq jii tutynatyn áleýmettik mańyzy bar taýarlar baǵasynyń turaqtylyǵyn qamtamasyz etýdi talap etti.
Qasym-Jomart Toqaev ákimderge turǵyndardyń qaýipsizdigin saqtaý jáne oqys oqiǵalardyń aldyn alý úshin tiisti sharalar qabyldaýdy tapsyryp, tótenshe jaǵdailardan saqtanýdyń mańyzdylyǵyn atap ótti.
Qazaqstan Prezidenti sóziniń sońynda óńirlerdi damytý jáne áleýmettik máselelerdi sheshý ákimderge júktelgen mańyzdy mindet ekenin aitty.
Keńesten keiin Memleket basshysy oblystar men respýblikalyq mańyzy bar qalalardyń birqatar ákimderimen jekelei kezdesti.
