Sailaý kúni qarsańynda Qazaqstannyń barlyq aýmaǵynda qaýipsizdik sharalary kúsheitiledi. Bul týraly ishki ister ministri Erlan Turǵymbaev aitty, dep habarlaidy "Ult aqparat".
Ministr qazir búkil eldiń aýmaǵynda "Quqyq tártibi" operatsiiasy júrgizilip jatqanyn, sondyqtan qaýipsizdik sharalary qolǵa alynǵanyn atap ótti.
"Operatsiia 6 maýsymǵa deiin júrgiziledi. Sailaýǵa bailanysty 7-12 maýsym aralyǵynda barlyq politsiia kúsheitilgen rejimde jumys isteidi", - dedi Turǵymbaev úkimet kýlýarynda.
Ol 8 maýsym tynyshtyq kúni ekenin, sondyqtan úgit-nasihatqa tyiym salynǵanyn eske saldy.
"9 maýsymda sailaý, ol óte erte bastalady. Qaýipsizdikti qamtamasyz etý úshin bizdiń patrýl barlyq derlik jerde jumys isteidi. Bul sailaý kezinde ótkiziletin qalypty sharalar", - dep sendirdi ministr.
Turǵymbaevtyń aitýynsha, qoǵamdyq qaýipsizdikti qamtamasyz etýge 21 myń politsei jumyldyrylmaq.
Qazaqstandaǵy prezident sailaýy
Kezekten tys prezident sailaýy 9 maýsymda ótedi. Sailaý ýchaskelerinde daýys berý tańǵy saǵat 7:00-den 20:00-ge deiin ótedi.
Osy joly Qazaqstan prezidenttigine jeti adam talasady. Olar:
-
Nur Otan partiiasy atynan Qasym-Jomart Toqaev;
-
"Ult taǵdyry" qozǵalysy atynan Ámirjan Qosanov;
-
Qazaqstan kommýnistik halyq partiiasy atynan Jambyl Ahmetbekov;
-
"Aýyl" partiiasy atynan Tóleýtai Raqymbekov;
-
"Aq jol" demokratiialyq partiiasy atynan Daniia Espaeva;
-
Kásipodaqtar federatsiiasy atynan Amangeldi Taspihov;
-
"Uly dala qyrandary" qoǵamdyq birlestigi atynan Sádibek Túgel.
Prezident sailaýyna 12 067 475 biýlleten daiyndalady.
