Qazaqstan pandemiia kezinde qaýipsiz sailaý ótkizýdiń úlgisin kórsetti. Bul týraly Germaniianyń Býndestag depýtaty M. Heldanyń syrtqy saiasi máseleler jónindegi keńesshisi, Germaniianyń syrtqy saýda jáne Federaldy Assotsiatsiiasynyń ekonomikalyq damý keńesshisi Ýrs Ýnkaýf málim etti, dep habarlaidy QazAqparat.
«Nur-Sultan qalasyndaǵy birneshe sailaý ýchaskesinde baiqaýshy boldym. Baqylaý barysynda baiqaǵanym Qazaqstandaǵy sailaý ulttyq zańnamaǵa jáne halyqaralyq standartqa sai ótip jatyr. Barlyq daýys berýshige teń quqyq berilgen. Adamdar bir orynda kóp shoǵyrlanbaýy úshin barlyq shara qarastyrylypty. Bul qýantarlyq jaǵdai. Jalpy Qazaqstannan bólek, buǵan deiin de shetelde ótken sailaýlarda baiqaýshy boldym. Onyń qatarynda Ázerbaijan elinde ótken sailaýda táýelsiz baiqaýshy bolsam, Ońtústik Afrika, Madagaskar, Kongo demokratiialyq respýblikasynda ótken sailaýlarda halyqaralyq sarapshy retinde qatystym. Ol kezde álemde koronavirýs indeti joq edi. Sondyqtan araqashyqtyqty saqtaý, maska taǵý mindettelmedi. Búgin Qazaqstan pandemiia kezinde qaýipsiz sailaý ótkizýdiń úlgisin búkil álemge kórsetti. Men barǵan árbir sailaý ýchaskesinde sanitarlyq talaptar qatań saqtalǵan», - dedi Ýrs Ýnkaýf elordada táýelsiz halyqaralyq baiqaýshylardyń qatysýymen ótken baspasóz máslihatynda.
Sondai-aq, Germaniia ókili Qazaqstanǵa sailaý baiqaýshysy retinde osymen altynshy ret taban tiregenin tilge tiek etti.
