QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda 2020 jylǵy egin jinaý jumystarynyń barysy qaraldy.
Egin jinaý naýqanynyń bastalýy týraly aýyl sharýashylyǵy ministri S. Omarov, janar-jaǵarmai materialdarymen qamtamasyz etý týraly energetika ministri N. Noǵaev, óńirlerdegi ahýal týraly Aqmola oblysynyń ákimi E. Marjyqpaev, Qostanai oblysynyń ákimi A. Muhambetov, Soltústik Qazaqstan oblysynyń ákimi Q. Aqsaqalov, Qaraǵandy oblysynyń ákimi J. Qasymbek baiandady, dep habarlaidy "Ult aqparat" primeminister.kz portalyna silteme jasap.
Qazirgi ýaqytta barlyq óńirler jappai egin jinaýǵa kiristi.
Biyl 22,7 mln ga jerge egin egildi, bul 2019 jylǵy deńgeiden 439 myń ga jerge artyq. Dándi daqyldar 15,9 mln ga (onyń ishinde bidai – 12,1 mln ga), maily daqyldar 2,9 mln ga, maqta 125,8 myń ga, qant qyzylshasy 20,9 myń ga, kókónis-baqsha ónimderi jáne kartop 457,4 myń ga, jemshóp daqyldary 3,3 mln ga alqapqa egildi.
Egin jinaý jumystaryn júrgizý úshin arzandatylǵan dizel otynynyń qajetti kólemi — 395 myń tonna (aýyl sharýashylyǵy taýaryn óndirýshiler úshin ortasha baǵa — shamamen 147 teńge/litr) anyqtaldy. Respýblikada 145 myń traktor, 75 myń traktor tirkemesi, 38 myń astyq jinaý kombainy, 15 myń destelegish, 39 myń júk avtomobili bar.
Agroónerkásiptik keshen sýbektilerin qoldaý úshin «Agrarlyq nesie korporatsiiasy» AQ respýblikalyq biýdjetten 70 mlrd teńge kóleminde biýdjettik nesie bóldi, olar 3,4 mln ga egis alqaptaryn qamti otyryp, tolyǵymen AÓK-tiń 2400 sýbektisine berildi. Memleket basshysynyń tapsyrmasy boiynsha «Qarapaiym zattar ekonomikasy» baǵdarlamasy aiasynda 100 mlrd teńge bólindi, sondai-aq Azyq-túlik kelisimshart korporatsiiasy aýyl sharýashylyǵy ónimderin forvardtyq túrde satyp aldy.
«Úkimet tarapynan egin jinaý jumystaryn qarjylai jáne materialdyq-tehnikalyq qamtamasyz etý úshin barlyq qajetti sheshimder qabyldandy. Jalpy alǵanda, qabyldanǵan sharalardyń esebinen osy jyly astyqtyń boljamdy jalpy jinalymy 18 mln tonna deńgeiinde (2019 jylǵa qaraǵanda 3,4% ósim) josparlanyp otyr. Qazaqstan ózin astyqpen tolyq qamtamasyz etedi. Eksport áleýeti de jaqsy bolady», — dedi A. Mamin.
Úkimet basshysy astyq jinaýdy sapaly ári ýaqytyly júrgizý, aýyl sharýashylyǵy taýaryn óndirýshilerdi janar-jaǵarmai materialdarymen qamtamasyz etý, sonymen qatar jinalǵan ónimdi ýaqytyly qabyldaý jáne tiisti saqtaý jaǵdailaryn erekshe baqylaý boiynsha barlyq qajetti sharalardy qabyldaýdy tapsyrdy.
