Qazaqstan Respýblikasynyń ekologiia, geologiia jáne tabiǵi resýrstar ministri Maǵzum Myrzaǵaliev Ózbekstan Respýblikasynyń sý sharýashylyǵy ministri Shavkat Hamraevpen kezdesý ótkizdi, dep habarlaidy "Ult aqparat".
Ekologiia, geologiia jáne tabiǵi resýrstar ministrliginiń baspasóz hatshysy Samal Ibraeva Facebook-tegi paraqshasynda jazǵandai, Qazaqstan Prezidenti Qasym-Jomart Toqaev pen Ózbekstan basshysy Shavkat Mirzieevtiń qol jetkizgen kelisimin júzege asyrý aiasynda taraptar eki el arasyndaǵy sý sharýashylyǵynyń mańyzdy salalaryn talqylady. Kezdesýdiń basty maqsattarynyń biri – Sardoba sý qoimasynyń taǵdyry. Qazaqstannyń ekologiia, geologiia jáne tabiǵi resýrstar ministri Maǵzum Myrzaǵaliev sý qoimasynyń jarylýy Ózbekstanmen birge Qazaqstanda turatyn halyqqa da úlken ekonomikalyq shyǵyn ákelgenin málim etken.
«Kelissózder barysynda biz Sardoba sý qoimasy boiynsha sheshimdi birlese qabyldaý týraly sheshimge keldik. Sý qoimasyna halyqaralyq jáne qazaqstandyq sarapshylardyń qatysýymen tehnikalyq aýdit júrgiziledi. Onyń qorytyndysy boiynsha osy sý qoimasynyń taǵdyry sheshiledi», - dep pikir bildirdi kezdesý qorytyndysy jaily Maǵzum Myrzaǵaliev.
Sonymen qatar taraptar transshekaralyq sý qoimalaryn basqarý, paidalaný men kúzetý isterin birlese júrgize úshin úkimetaralyq kelisim ázirlep, qol qoiatyny jaily kelisimge kelgen. Taraptar osy jyldyń 15 maýsymyna deiin Sý qatynastary salasyndaǵy yntymaqtyq boiynsha jol kartasyn ázirlep, bekitýge kelisti. Kezdesýge qatysýshylar odan bólek 2020 jyly Syrdariia ózeni boiynsha vegetatsiialyq kezeńdi ótkizý sharalardy ótkizýdi ózara maquldasty.
«Negizgi gidroqurylymdar men sý sharýashylyǵy ýchaskelerine monitoring pen baqylaý júrgizý boiynsha birleske jumysty uiymdastyrý týraly sheshimge qol jetkizildi», - dedi Maǵzum Myrzaǵaliev.
Kezdesýge qatysýshylar Syrdariia ózeniniń sý resýrsynyń sharýashylyq úilesimi boiynsha birlesken jumysty júrgizýge kelisip, Qaradariia men Shyrshyq ózenderine sý jiberý limitin talqylaý múmkindigin qarastyrdy.
