Memleket basshysy Qasym-Jomart Toqaevtyń qazaqstandyqtardy koronavirýsty juqtyrýdan qorǵaý jóninde is-sharalar qabyldaý týraly tapsyrmasyna sáikes, QR Úkimeti QHR aýmaǵyndaǵy jáne otanyna oralýǵa tilek bildirgen qazaqstandyqtardy evakýatsiialaidy. Bul týraly QR Syrtqy ister ministrligi Telegram-da jazdy, dep habarlaidy "Ult aqparat".
Biylǵy 10 jáne 12 aqpanda qazaqstandyq azamattardy ákelý úshin Qytai biligimen kelisim boiynsha Beijińge «Air Astana» áýekompaniiasynyń eki ushaǵy jiberiledi. Ushý barysynda jolaýshylarmen birge meditsinalyq qyzmetkerler bolady.
«Qytai tarapynyń ótinishi boiynsha osy reister arqyly Beijińge Qazaqstandaǵy Qytaidyń 47 azamatyn, sondai-aq Qytai Elshiliginiń kommertsiialyq emes júgin jetkizý josparlanýda.
Qazirgi ýaqytta QHR aýmaǵynda QR-dyń 719 azamaty bar, onyń 391 otanyna oralýǵa kómek kórsetý týraly ótinish bildirdi. Qalǵandary – diplomatiialyq mekemelerdiń qyzmetkerleri men otbasy músheleri, stýdentter jáne basqa da jeke tulǵalar Qytaida qalýǵa tilek bildirdi.
Qazaqstannyń QHR-daǵy diplomatiialyq mekemeleri qajet bolǵan jaǵdaida tiisti kómek kórsetý úshin QR azamattarymen jumysty jalǵastyrýda jáne turaqty bailanysta. Atalǵan barlyq sharalar QHR aýmaǵyndaǵy bizdiń azamattarǵa bailanysty barlyq máselelerdi sheshýge syndarly kózqaras tanytatyn Qytai tarapymen tyǵyz úilestirý negizinde júzege asyrylady», - delingen ministrlik málimetinde.
