Basty róldi Samal Esliamova somdaǵan, rejisser Sergei Dvortsevoidyń «Aika» kartinasyn Amerika kinoakademiiasy Qazaqstan atynan «Oskar» júldesine ótkizbegeni qyrkúiek aiynda belgili bolǵan.
Mádeniet jáne sport ministrligi bul qorytyndy resmi sheshim emes ekenin bildirip, áli de tiisti jumystar isteletinin eskertken edi.
Osy oraida ministr Arystanbek Muhamediuly "Aika" filminiń «Oskar» júldesiniń long-paraqshasyna qalai ótkeni jaily óz pikirin bildirdi.
«Aika» filminiń Qazaqstan atynan «Oskar» júldesine usynylýy - sapasy men basqadai talaptar boiynsha da laiyqty dúnie sanalady.
Deitursaq ta Kinoakademiia direktsiiasy tarapynan osy kartinany túsirgen rejisser Sergei Dvortsevoiǵa qatysty biraz saýaldar týyndaǵan. Onyń Shymkent qalasynda týyp, keiin Reseige qonys aýdaryp, azamattyǵyn aýystyrǵany týraly málemet keri áserin tigizgen syńaily.
Osyndai sebeppen Amerikalyq kinematografiialyq óner jáne ǵylym akademiiasy bizdiń eldiń atynan túsken ótinishti qabyl almady. Sebebi, bul kartinada olardyń oiynsha ulttyq mazmunnyń 50% deńgeii joq kórinedi.
- Qalai degenmen «Aika» filmi Qazaqstan atynan «Oskar» júldesiniń long-paraqshasyna enzigildi. Sonymen qatar «Úzdik sheteldik film» nominatsiiasy boiynsha da atalymǵa endi. Osynyń aldynda amerikalyq kinoakademiia «Aika» kartinasyna qarsylyq tanytyp edi, sony qalai rettedińizder?
- O basta «Aika» kartinasyn usynǵanda, bizdiń ótinishimizge orai qandai kózqaras týyndaǵanyn ózderińiz jaqsy bilesizder. Osy oraida shyǵarmashylyq jáne túsirilim tobynyń úlesi jaǵynan qazaqstandyqtardyń basym ekenin dáleldeýimiz kerek boldy. Negizgi júkti kótergender óz elimizdiń túlekteri: prodiýser Gúlnár Sársenova, basty róldi somdaǵan Samal Esliamova jáne kompozitor Rýstam Goipov boldy.
Birinshi - bas rejisser Sergei Dvortsevoidyń Qazaqstanda týyp, oqyǵany jáne osynda óziniń birtalai kinotýyndylaryn dúniege ákelip, shyǵarmashylyq jaǵynan qalyptasqanyn, sondai-aq áli kúnge deiin onyń anasynyń Shymkent qalasynda turyp jatqanyn da aldyǵa tarttyq. Ekinshiden – osy filmge at salysqan azamattardy tolyq atap kórsettik. Sonymen shyǵarmashylyq toptyń 60%-yn otandastar qurady.
Osyǵan orai Amerikalyq kinoakademiiaǵa taǵy da hat joldadyq. Qorytyndysynda «Aika» kartinasynyń qazaqstandyq mazmundy film ekenin dáleldep, «Oskar» júldesiniń shet eldik filmder atalymy boiynsha kelesi jylǵy long-paraqshasyna ilindik.
Aita ketý kerek, «Oskar» júldesine ártúrli nominatsiialar boiynsha 150-den astam ótinish túsken eken. Kórkemdik sapasy boiynsha bizdiń film tańdaý sharttaryna tolyq sáikes keledi. «Aika» filmi týraly aqparat júlde taǵaiyndaý komitetiniń saityna ornalastyrylǵan – dep atap ótti Arystanbek Muhamediuly.
