Foto: https://www.shutterstock.com/
Qazaqstan Ortalyq Aziia elderi arasynda ortasha jalaqy mólsheri boiynsha aiqyn kóshbasshy bolyp tur, bul týraly Ranking.kzke silteme jasap Ult.kz habardaidy.
TMD Memleketaralyq statistikalyq komiteti jariialaǵan málimetterge sáikes, 2024 jylda Qazaqstanda ortasha nominaldy jalaqy 817,2 AQSh dollaryn quraǵan.
Bul kórsetkish Ózbekstandaǵy (437,8 dollar) jáne Qyrǵyzstandaǵy (411,2 dollar) jalaqydan shamamen eki ese joǵary. Al Tájikstan Qazaqstannan 3,4 ese artta qalyp otyr, onda ortasha jalaqy 242,8 dollardy quraǵan.
Aita ketý kerek, Tájikstandaǵy bul kórsetkish sońǵy jyldary aitarlyqtai ósim kórsetken. Nominaldy jalaqy bir jyl ishinde 24,9%-ǵa, al naqty jalaqy 21,1%-ǵa artqan. Bul Ortalyq Aziia óńirindegi eń joǵary ósim. Al Qazaqstan, Qyrǵyzstan jáne Ózbekstanda jalaqynyń ósý qarqyny budan tómen bolǵan.
Qazaqstandaǵy eń tómengi jalaqy mólsheri de óńir boiynsha eń joǵary deńgeide. Ótken jyly ol 85 myń teńgeni (181,1 dollar) qurady. Ózbekstanda bul kórsetkish 89,4 dollar bolsa, Tájikstanda – 54,9 dollar, al Qyrǵyzstanda – 28,3 dollar deńgeiinde boldy.
Sonymen qatar, Qazaqstandaǵy qarjy salasy men taý-ken ónerkásibi eń joǵary tabysty salalar qatarynda. Mysaly, qarjygerler men saqtandyrý salasy mamandarynyń jalaqysy orta eseppen 1,7 myń dollardan asady, bul Tájikstandaǵy kórsetkishten úsh ese joǵary.
Ortalyq Aziia elderi Eýropa elderimen salystyrǵanda ómir súrý qunynyń tómendigimen erekshelenedi. Qazaqstan, Qyrǵyzstan jáne Ózbekstan turǵyndary úshin ómir súrý shyǵyndary salystyrmaly túrde qoljetimdi bolǵanymen, Qazaqstannyń ekonomikalyq áleýeti men jalaqy deńgeii óńirdegi kóshbasshylyq ornyn aiqyndaidy.
