OPEK+ formatyndaǵy ministrler jiyny barysynda QR Energetika ministri Nurlan Noǵaev munai óndirýshi elder arasyndaǵy dialogty qaita bastaýǵa shaqyrdy, dep habarlaidy "Ult aqparat" vedomstvonyń baspasóz qyzmetine silteme jasap.
OPEK+ kelisimine qatysýshy elder ministrleriniń kelissózderi beinekonferentsiia formatynda ótti. Óz sózinde QR Energetika ministri Nurlan Noǵaev Qazaqstan syndarly dialogtyń jaqtaýshysy bolǵanyn jáne bolyp qala beretinin atap ótti.
«OPEK+ formatyndaǵy munai óndirýshi elder arasyndaǵy dialogty qaita bastaý mańyzdy oqiǵa. Búgingi otyrys álemdik munai indýstriiasy tarihynda óz ornyn alar dep esepteimin», - dedi Noǵaev.
Ǵalamdyq ekonomikalyq ósim baiaýlaǵan jaǵdaida munaiǵa degen suranystyń tómendeýi baǵanyń odan ári tómendeýine, sonymen birge álemdik munai óndirisiniń tómendeýine jaǵdai jasaidy. Negizgi munai óndirýshi elder arasynda úilesimdi is-qimyldyń bolmaýy onsyz da kúrdeli jaǵdaidy qiyndata túsýde.
Ministr Qazaqstan OPEK+ kelisiminiń qatysýshysy bola otyryp, árqashan óz mindettemelerin oryndaǵanyn atap ótti.
«Biz aldaǵy kelissóz qorytyndysy boiynsha oń nátijege qol jetkizemiz degen úmittemiz. Bul rette álemdik munai naryǵyndaǵy baiqalǵan teńgerimsizdik tek OPEK+ elderiniń kúsh-jigeri jetkiliksiz bolatynyn jáne jaǵdai naryqtyń barlyq qatysýshylarynyń belsendi qatysýyn talap etetinin kórsetip otyr. Biz óz kezegimizde búgingi kún tártibiniń ózektiligin túsinemiz. Munai óndirýdi jalpy qysqartýǵa qatysýǵa daiynbyz», - dedi Nurlan Noǵaev.
On bir saǵatqa sozylǵan kelissóz nátijesinde taraptar qandai da bir kelisimge kele alǵan joq. Qazaqstan óz kezeginde aldaǵy ýaqytta munai óndirý kólemin qysqartý boiynsha kollektivti ortaq sheshim qabyldanady dep úmittenedi. Bul shara óz kezeginde munai indýstriiasyna oń áserin tigizedi.
Eske sala ketsek, Nurlan Noǵaev bastaǵan qazaqstandyq delegatsiia ótken aida Avstriiada ótken OPEK+ birlesken ministrlik monitoring komitetiniń 18-otyrysyna qatysqan bolatyn. Onda álemdik munai naryǵyn turaqtandyrý jóninde tiisti usynystar qaraldy.
