Saýda jáne integratsiia ministri Baqyt Sultanov Qazaqstan naryǵyna kirgizilip jatqan sheteldik taýarlardyń sapasy tómen ekenin málim etti, dep habarlaidy "Ult aqparat".
«Búgin biz ishki naryqta sheteldik taýarlardyń artyp bara jatqanyn kórip otyrmyz. Olar negizinen sapasy tómen taýarlar. Bul bizdiń azamattarymyzdyń ómir súrý sapasynyń deńgeiine de áser eteri sózsiz. Búgingi kúrdeli problemalardyń biri – qabyldanǵan 8800-den astam ulttyq standarttyń jartysy qajetsiz degen oimen bizneste qoldanylmaityny. Otandyq ónimniń qaýipsizdigin qamtamasyz etetin synaq bazasy da jańǵyrtýdy qajet etedi», - dedi ministr Úkimet otyrysynda.
Baqyt Sultanovtyń aitýynsha, syrtqy naryqtaǵy otandyq taýardyń básekege qabilettiligi eksporttyq qorjyndy ártaraptandyrýdyń tómendigin kórsetedi.
«Sonymen qatar taýarlar men qyzmetter eksportyn shetelde ilgeriletý boiynsha qalyptasqan infraqurylymnyń joqtyǵy men qoiylǵan kedergiler syrtqy naryqtarǵa qol jetkizý protsesin áldeqaida qiyndatady. Bul rette biz saýdanyń syrtqy jáne ishki kontýrlaryna yqpal etetin trendterdi de umytpaýymyz kerek. Ishki naryqta sheteldik bólshek saýda jelileriniń ekspansiiasy baiqalýda. Olardyń sórelerinde kóbinese óz elderinde shyǵarylǵan ónimder satylyp jatyr», - dedi ol.
Aita ketsek, búgin Úkimet saýdany damytýdyń memlekettik baǵdarlamasynyń 2021-2025 jyldarǵa arnalǵan tujyrymdamasyn bekitken bolatyn.
