Mysyr tarapynyń shaqyrýymen 2021 jyldyń 5-7 aqpany aralyǵynda Qazaqstan – Mysyr saýda-investitsiialyq biznes forýmy ótti, dep habarlaidy "Ult aqparat" QR SIM baspasóz qyzmetine silteme jasap.
QR Syrtqy ister ministriniń orynbasary Almas Aidarov bastaǵan delegatsiiany elimizdiń 13 óńirinen barǵan 60-tan astam qazaqstandyq kompaniia, sondai-aq memlekettik organdar men kvazimemlekettik qurylymdardyń ókilderi tanystyrdy. Forýmǵa Mysyr tarapynan iskerlik qoǵamdastyqtyń 200-den astam ókili, sondai-aq Syrtqy ister ministriniń orynbasary Tarik ál-Ýasimi, Ońtústik Sinai provintsiiasynyń gýbernatory Haled Fýda, Mysyr saýda palatalary federatsiiasynyń basshysy Ibrahim ál-Arabi qatysty.
Eske sala ketsek, 2019 jylǵy 6 naýryzda Nur-Sultan qalasynda Qazaqstan-Mysyr biznes-forýmy ótti, oǵan eki eldiń 100-den astam biznes ókilderi qatysty.
Qazaqstan Elshisi Qairat Lama Shariftiń aitýynsha, qos tarap eki el arasyndaǵy saýda-ekonomikalyq jáne investitsiialyq bailanystardyń deńgeiin odan ári arttyrý úshin ózara is-qimyldyń barlyq baǵyttary boiynsha yntymaqtastyqty arttyrýǵa nietti.
«Qazaqstan Mysyrdy Afrikanyń «qaqpasy» retinde qarastyra otyryp, ekijaqty iskerlik keńes pen saýda-ekonomikalyq yntymaqtastyq jónindegi úkimetaralyq komissiianyń kómegimen eksportty ary qarai ilgeriletýge daiyn. Eýraziialyq ekonomikalyq odaqqa múshe elder men Mysyr arasyndaǵy erkin saýda týraly kelisimge qol qoiý qazaqstandyq ónim eksportyn ulǵaitýǵa qosymsha serpin beredi, bul halqy 100 million adamnan asatyn Mysyr naryǵyna jol ashady», – dep atap ótti Qairat Lama Sharif.
Forýmdaǵy baiandamashylardyń pikirinshe, ónimniń qymbattaýy jáne eki el arasyndaǵy saýda qarqynynyń birshama baiaýlaýy memleketterdiń geografiialyq alystyǵyna da bailanysty. Alaida, Qazaqstannyń Saýda jáne integratsiia vitse-ministri Qairat Tórebaev atap ótkendei, osyǵan qaramastan, Qazaqstan tarapy ekijaqty taýar ainalymyn 4 esege jýyq ulǵaitýǵa múmkindikti kórip tur.
«Bul turǵyda otandyq kompaniialar 300 million AQSh dollaryna jýyq somaǵa sapaly taýarlar usyna alady. Azyq-túlik qaýipsizdigin qamtamasyz etý maqsatynda mysyrlyq kompaniialar ózderiniń eksportqa baǵdarlanǵan óndiristerin Qazaqstanda ornalastyra alady. Bul baǵyt úshin mundai jobalardy jeńildikpen kreditteý, eksporttyq kelisimsharttardy saqtandyrý, taýarlardy tasymaldaýǵa jáne servistik qoldaýǵa arnalǵan shyǵyndardy óteý kózdelgen. Budan basqa, jaqyn arada Qazaqstan otandyq ónimdi sheteldik satyp alýshylar úshin paiyzdyq mólsherlemeni CIRR deńgeiinde sýbsidiialaityn bolady. Basqasha aitqanda, bul kórsetkish ai saiyn negizde Ekonomikalyq yntymaqtastyq jáne damý uiymynyń hatshylyǵy belgileitin paiyzdyq mólsherleme boiynsha sanalady», – dep atap ótti vitse-ministr.
Osy baǵyttaǵy jumysty jandandyrý Mysyr Syrtqy ister ministriniń Qazaqstanǵa aldaǵy alǵashqy resmi saparymen jáne eki el arasynda kezekti saiasi jáne konsýldyq konsýltatsiialar ótkizýmen bailanysty. Bul týraly óz sózinde Mysyr Syrtqy ister ministriniń orynbasary T. ál-Ýasimi aitty.
Is-shara barysynda «Qazaqstanda jasalǵan» ámbebap kórmesi uiymdastyryldy, onda qonaqtardyń nazaryna otandyq óndirýshilerdiń, onyń ishinde Afrika qurlyǵyna eksporttaityn kompaniialardyń ónimderi usynyldy. Sonymen qatar, otandyq jáne mysyrlyq kompaniialar arasynda ekijaqty biznesaralyq (V2V) kelissózder júrgizildi
Is-shara qorytyndysy boiynsha birqatar ekonomikalyq qujattarǵa qol qoiyldy. Osylaisha, qazaqstandyq kompaniialar Mysyr naryǵyna 3 millionǵa deiin ulǵaitý perspektivasymen 1 million dana kóleminde bótelkedegi sýdy jetkizý, qazaqstandyq kásiporyn negizinde farmatsevtikalyq dári-dármekterdi shyǵarý, sondai-aq Qazaqstan aýmaǵynda mys ken ornyn satyp alý týraly ýaǵdalasty.
Atalǵan forým mysyrlyq kásipkerlerdiń shikizattyq emes sektordyń qazaqstandyq taýarlaryna qyzyǵýshylyǵyn qalyptastyrýǵa yqpal etip, otandyq taýar óndirýshiler men áleýetti mysyrlyq satyp alýshylar men investorlar arasynda tikelei bailanystardy jolǵa qoiýdy, ónimniń sapalyq jáne baǵalyq kórsetkishteri boiynsha aqparat almasýdy qamtamasyz etti. Eki el arasynda turaqty saýda missiialary men kezdesýlerdi ótkizý týraly sheshim qabyldandy.
