Qazaqstan Mianma úkimetin eldegi rohindja-musylmandarynyń jaǵdaiyna bailanysty problemalardyń túbegeili sebepterin joiýǵa barlyq kúsh-jigerin jumsaýǵa shaqyrady, dep habarlaidy QR SIM baspasóz qyzmeti.
Bul týraly Qazaqstannyń Birikken Ulttar Uiymy janyndaǵy Turaqty ókili Qairat Omarov BUU Qaýipsizdik Keńesiniń Mianmadaǵy ahýal boiynsha ótken otyrysynda málimdedi. Kezdesý barysynda BUU Bas hatshysy Antoniý Gýterrish jáne BUU Bosqyndar isi jónindegi agenttiginiń izgi nietti elshisi, aktrisa Keit Blanshett Mianmadaǵy rohindja-musylmandarynyń jaǵdaiy týraly baiandamalaryn jasady.
Qazaqstan Elshisi dál osydan bir jyl buryn halyqaralyq qoǵamdastyq Mianmadan Bangladeshke 700 myńnan astam rohindja-musylmandardyń qashyp ketken eń iri gýmanitarlyq apattardyń birine kýá bolǵanyn atap ótti.
«Eń tańqalarlyǵy-rohindja-bosqyndardyń 60%-y - úilerinen ketýge májbúr bolǵan jáne biz sáýir aiynda Bangladeshte ózimiz kórgenimizdei bosqyndar lagerlerinde óte qiyn jaǵdaiǵa tap bolyp otyrǵan balalar», - dedi Q.Omarov.
Qazaqstan BUU jáne barlyq gýmanitarlyq áriptesterdiń rohindja-bosqyndarǵa azyq-túlik, baspana, dári-dármekter, sý jáne basqa da kómek kórsetý quraldaryn usynýǵa baǵyttalǵan kúsh-jigerin joǵary baǵalaidy.
Ústimizdegi jyldyń sáýir aiynda Qazaqstan Úkimeti Bangladeshtegi Koks-Bazar qalasynyń mańyndaǵy aýmaǵynda ornalasqan rohindja-bosqyndarǵa 500 myń dollar kóleminde gýmanitarlyq kómek kórsetip, ony olar turatyn jerlerge jetkizdi.
Mianmada qazirgi jaǵdai týraly aita kelip, Q.Omarov BUU-nyń málimetteri boiynsha etnikalyq rohindja halqy ókilderiniń júrip-turý bostandyǵyna, sondai-aq bilim alý, densaýlyq saqtaý jáne ómirlik daǵdylaryna qol jetkizýge qatań shekteýler áli qalýda ekenin atap ótti. «Rohindja-bosqyndar kepildikti qaýipsizdikti jáne osy máseleler boiynsha naqty progresti kórip turǵan kezde ǵana olar elge oralady», - basa aitty Qazaqstan elshisi.
Qazaqstannyń Turaqty ókili sondai-aq Mianmadaǵy Rohindja halqynyń quqyqtaryn buzýshylyqtardy tergeý boiynsha táýelsiz komissiia qurýyn tatýlastyqqa jáne ótpeli ádilettilikke baǵyttalǵan negizgi qadamdardyń biri retinde atady. Sonymen qatar, ol Komissiiaǵa musylman qaýymdastyǵynyń ókilin qosý onyń bedelin edáýir arttyryp, «kópirlerdi salýǵa» kómektesýge múmkindik bere alatyndyǵyn atap ótti.
Jalpy, BUU Qaýipsizdik Keńesiniń músheleri rohindja-bosqyndardyń problemalaryn Mianmadaǵy burynǵy turǵylyqty jerlerge qaýipsiz, qaiyrymdy jáne óz erkimen oralýy úshin tez arada sheshý qajettigi týraly biraýyzdy boldy.
Aita keteiik, Qazaqstan tarapy rohindjalyq 626 myń bosqynnyń taǵdyryna alańdaýshylyq bildirip, gýmanitarlyq kómek joldaǵan bolatyn.
