"KQK-R" AQ qubyr júiesi arqyly qazaqstandyq munaidy eksporttaý qalypty rejimde jumys istep tur. Bul týraly Energetika ministrligi málimdedi, - dep habarlaidy "Ult aqparat".
"Buǵan deiin Novorossiisk qalasynyń Primorsk aýdandyq soty sýdiasynyń 5 shildedegi sheshimi boiynsha "KQK-R" AQ qyzmetin 30 táýlikke ákimshilik toqtata turý túrindegi jaza taǵaiyndaldy. Úzdiksiz áreketti eskere otyryp, "KQK-R" AQ sotqa sýdia sheshiminiń oryndalýyn toqtata turý týraly ótinishhat berdi", - dedi vedomstvo habarlamasynda.
Energetika ministrligi konsortsiým Reseidiń tiisti memlekettik organdarymen jáne vedomstvolarymen Rostransnadzor buiryǵynda kórsetilgen qujattyq zańbuzýshylyqtardy joiý úshin jumys istep jatqanyn atap ótti.
"Qazirgi ýaqytta qazaqstandyq munaidy "KQK-R" AQ qubyr júiesi arqyly eksporttaý turaqty rejimde júzege asyrylyp jatyr", - dedi ministrlik ókilderi.
Buǵan deiin "Kaspii qubyr konsortsiýmy" aktsionerlik qoǵamy Novorossiisk qalasy Primorsk aýdandyq sotynyń sýdiasy 2022 jyldyń 5 shildesindegi qaýlysymen "QQK-R" AQ qyzmetin 30 táýlikke toqtatý túrinde ákimshilik jaza taǵaiyndaǵanyn habarlady. Artynsha kompaniia sot sheshimin oryndaýdy 30 kúnge keiingi qaldyrý týraly ótinish bergenin, óitkeni mundai áreket óndiriske aýyr saldar men zardaptar ákelýi múmkin ekenin málimdedi.
KQK – qazaqstandyq munai úshin negizgi eksporttyq baǵyt, oǵan qubyr arqyly aidalatyn kólemniń 80%-ten astamy tiesili. Qubyr jelisiniń qýattylyǵy – jylyna 67 million tonna munai.
