Qazaqstan Respýblikasy Syrtqy ister ministrligi Investitsiialar komitetiniń tóraǵasy Asqar Shoqybaev Kievte Ýkraina Syrtqy ister ministriniń orynbasary Evgenii Eninmen kezdesti, dep habarlaidy "Ult aqparat" QR Ýkrainadaǵy elshiligine silteme jasap.
«Taraptar jaqynda ótken Qazaqstan-Ýkraina investitsiialyq forýmyna joǵary baǵa berip, eki el arasyndaǵy kópjosparly saýda-ekonomikalyq yntymaqtastyqty damytýǵa múddeliligin rastady. Basym baǵyttar arasynda: agroónerkásiptik keshen, mashina jasaý jáne farmatsevtika. Osy salalarda úlken tájiribe, sondai-aq jańa iri jobalar da bar», - delingen habarlamada.
A.Shoqybaev atap ótkendei, eń aldymen, daiyn ónimderdi kórshi memleketterdiń naryqtaryna shyǵarý úshin QR aýmaǵynda birlesken kásiporyndar qurý týraly sóz bolyp otyr.
E. Eninniń aitýynsha, atalǵan baǵyttar boiynsha júieli jumys eki eldiń yntymaqtastyǵyn nyǵaitýǵa múmkindik beredi. Sondai-aq ol Ýkraina tarapynyń jaqyn arada saýda-ekonomikalyq yntymaqtastyq jónindegi Qazaqstan-Ýkraina Memleketaralyq komissiiasynyń kezekti otyrysyn jáne kólik jáne kommýnikatsiia máseleleri jónindegi ekijaqty kelissózderdi ótkizýge daiyndyǵyn rastady.
Budan bólek, Taraptar jaqynda Slovakiiada ótken QR Syrtqy ister ministri M.Tileýberdi men Ýkraina Syrtqy ister ministriniń birinshi orynbasary E. Japarovanyń kezdesýi barysynda qol jetkizilgen ýaǵdalastyqtardy damytýda eki eldiń halyqaralyq uiymdar sheńberindegi ózara is-qimylyn tereńdetýdiń birqatar aspektilerin naqtylady
