Nur-Sultan qalasynda QR Premer-Ministri Álihan Smaiylov pen Túrkiia vitse-prezidenti Fýat Oktaidyń tóraǵalyǵymen Saýda-ekonomikalyq yntymaqtastyq jónindegi Qazaqstan-Túrkiia úkimetaralyq komissiiasynyń XII otyrysy ótti, dep habarlaidy primeminister.kz saity.
Otyrys barysynda taraptar eki el arasyndaǵy saýda-ekonomikalyq yntymaqtastyqty damytýdyń aýqymdy máselelerin talqylady. Atap aitqanda, tranzittik-kólik, ónerkásip, týrizm, geologiia, densaýlyq saqtaý jáne agroónerkásiptik keshen salalaryndaǵy ózara is-qimyl máseleleri qaraldy. Sondai-aq eki el arasyndaǵy áýe joldarynyń geografiiasyn keńeitý jáne turaqty reister sanyn arttyrý qajettiligine nazar aýdaryldy.
Túrkiia — Qazaqstannyń mańyzdy saýda-ekonomikalyq jáne investitsiialyq seriktesteriniń biri. Ótken jyldyń qorytyndysy boiynsha Qazaqstan men Túrkiia arasyndaǵy taýar ainalymy 33%-ǵa ósip, $4,1 mlrd asty.
Eki el áriptestiginiń strategiialyq sipatyna toqtalǵan QR Premer-Ministri 2021 jyly Qazaqstannan Túrkiiaǵa eksport 39%-ǵa ósip, shamamen $3 mlrd jetkenin, 2021 jyly Túrkiiadan Qazaqstanǵa import 20,5%-ǵa artyp, $1,1 mlrd quraǵanyn atap ótti.
Búgingi tańda túrik biznesi Qazaqstanda jalpy quny $5,5 mlrd quraityn investitsiialyq jobalardy júzege asyryp jatyr.
Óz kezeginde Túrkiia vitse-prezidenti F. Oktai Túrkiia Respýblikasy Qazaqstanmen barlyq baǵyttar boiynsha ekijaqty yntymaqtastyqty ári qarai nyǵaitýǵa daiyn ekenin, munyń ózara tiimdi áriptestikti damytýǵa yqpal etetinin atap ótti.
Otyrys aiasynda ekonomikalyq yntymaqtastyq boiynsha jan-jaqty kelissózder júrgizildi. Qazaqstan tarapynan indýstriia jáne infraqurylymdyq damý ministri, saýda jáne integratsiia, ulttyq ekonomika, densaýlyq saqtaý vitse-ministrleri jáne basqalary qatysty.
Túrik tarapynan indýstriia jáne tehnologiia, saýda, kólik jáne infraqurylym, densaýlyq saqtaý vitse-ministrleri qatysty. Sońynda ÚAK otyrysynyń qorytyndy hattamasyna qol qoiylyp, birlesken jospar qabyldandy. Resmi delegatsiia músheleri ózara saýda-ekonomikalyq yntymaqtastyqtyń ózekti máselelerin talqylaý úshin ekijaqty kezdesýler ótkizdi.
