Qasym-Jomart Toqaev elimizge memlekettik saparmen kelgen Túrkiia Respýblikasynyń Prezidenti Rejep Taiip Erdoǵanmen kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
«Aqorda» rezidentsiiasynda Túrkiia basshysyn saltanatty qarsy alý sharasy ótti. Qasym-Jomart Toqaev pen Rejep Taiip Erdoǵan bir-birine delegatsiialar quramyn tanystyrdy. Qurmet Qaraýylynyń bastyǵy eki el basshylaryna raport berip, Qazaqstan men Túrkiianyń ánurandary oryndaldy. Saltanatty rásimnen keiin memleketter basshylary ekijaqty kezdesý ótkizdi.
Qasym-Jomart Toqaev Rejep Taiip Erdoǵanǵa iltipat bildirip, Qazaqstanǵa memlekettik saparmen kelgeni úshin rizashylyǵyn jetkizdi.
– Sizdiń búgingi memlekettik saparyńyz eki eldiń yntymaqtastyǵyna úlken serpin beredi dep oilaimyn. Biz Túrkiiamen teń dárejedegi yntymaqtastyqty odan ári nyǵaitýǵa basa men beremiz. Bul meniń erekshe nazarymda. Kezdesýimizdiń kún tártibindegi birqatar máseleler boiynsha pikir almasyp, ýaǵdalastyqqa qol jetkizemiz dep oilaimyn, – dedi Memleket basshysy.
Óz kezeginde Túrkiia Prezidenti Rejep Taiip Erdoǵan Qasym-Jomart Toqaevqa mamyr aiynda Túrkiiaǵa memlekettik sapary men Niý-Iorktegi ekijaqty kezdesýden keiin qaitadan júzdesip otyrǵanyna qýanyshty ekenin atap ótip, qonaqjailyǵy úshin alǵys aitty.
– Búgin Joǵary deńgeidegi strategiialyq yntymaqtastyq keńesiniń 4-otyrysyn ótkizemiz. Sondai-aq erteń Aziiadaǵy ózara is-qimyl jáne senim sharalary keńesiniń sammitine qatysamyz. Sizdiń kóshbasshylyǵyńyzben júrgizilgen reformalar qazaq halqynyń tynyshtyǵyn saqtap, ál-aýqatyn jaqsartatynyna senimim mol. 20 qarasha kúni bolatyn Prezident sailaýy ádil ári jańa Qazaqstan úshin qaiyrly bolýyn jáne sizge sol sailaýda sáttilik tileimin, – dedi Rejep Taiip Erdoǵan.
Sondai-aq Túrkiia Prezidenti jahandyq jáne aimaqtyq turaqsyzdyq beleń alǵan shaqta túrki memleketteriniń yntymaǵyn odan ári nyǵaitý qajet ekenin, sondyqtan strategiialyq seriktes ári baýyrlas el Qazaqstannyń qaýipsizdigine, turaqtylyǵyna, territoriialyq tutastyǵyna jáne ekonomikalyq ál-aýqatynyń jaqsarýyna airyqsha mán beretinin jetkizdi.
– Túrkiiaǵa memlekettik saparyńyz barysynda qol qoiylǵan 14 yntymaqtastyq týraly qujat pen ortaq deklaratsiia qarym-qatynasymyzǵa tyń serpin berdi. Búgin osy kelisimderge qosymsha jańa qujattar qosylady. Atajurtyma kelgen maǵan jáne meniń delegatsiiama qonaqjailyq kórsetkenińiz úshin taǵy da alǵys aitamyn, – dedi Rejep Taiip Erdoǵan.
