Qazaqstan Prezidenti Nursultan Nazarbaev Túrikmenstan Prezidenti Gýrbangýly Berdimuhamedovpen keńeitilgen quramda kelissóz júrgizdi, - dep habarlaidy "Ult aqparat" Aqordaǵa silteme jasap.
Kelissóz barysynda Memleket basshysy Túrikmenstan Prezidentiniń sapary elderimiz arasyndaǵy diplomatiialyq qatynastyń 25 jyldyǵymen tuspa-tus kelgenin atap ótti.
– Bizdiń qatynasymyz shirek ǵasyrda ózara senim jáne qoldaýdyń negizinde qalyptasty. Túrikmenstan – Qazaqstannyń óńirdegi mańyzdy seriktesi ári odaqtasy. Eki eldiń halqy bir-birimen baýyrlas ári tatý kórshi. Bizdi ǵasyrlar qoinaýynan jalǵasyp kele jatqan ortaq tarihi tamyr, til men din bailanystyrady, – dedi Qazaqstan Prezidenti.
Nursultan Nazarbaev jekelegen baǵyttar, sonyń ishinde kólik-tranzit jáne energetika salalary boiynsha ekijaqty yntymaqtastyqtyń damyp kele jatqanyn atap ótip, bul rette basqa da salalardyń zor perspektivasy bar ekenine nazar aýdardy.
– Búgin biz Qazaqstan men Túrikmenstan arasyndaǵy strategiialyq seriktestik týraly asa mańyzdy shartqa qol qoiamyz. Osy kelisimniń arqasynda qatynastarymyz damýdyń jańa kezeńine ótkeli tur. Biz elderimiz arasyndaǵy shekaraǵa qatysty barlyq máseleni sheshemiz. Shekaraǵa qatysty túitkildi máseleleri múldem joq elder bizdiń eki memleketterimiz ǵana bolmaq, – dedi Memleket basshysy.
G.Berdimuhamedov óziniń Qazaqstanǵa memlekettik sapary eki el arasyndaǵy yntymaqtastyqty nyǵaita túsetinine senim bildirdi.
Eki el prezidentteri halyqaralyq saiasat, ekijaqty yntymaqtastyq, óńirlik ózara is-qimyl, mádeni-gýmanitarlyq jáne áleýmettik salalardaǵy yntymaqtastyq máselelerin talqylady.
– Qazaqstan men Túrikmenstannyń halyqaralyq arenada oń bedel men reitingke ie bolyp kele jatqanyn erekshe atap ótken jón. Biz beibitshilik, turaqtylyq jáne qaýipsizdik máseleleri boiynsha óz ustanymymyzdy tek óńirde ǵana emes, búkil dúnie júzinde BUU men EYQU siiaqty halyqaralyq qurylymdarmen birge aiqyndap kelemiz, – dedi G.Berdimuhamedov.
Sondai-aq, keńeitilgen quramdaǵy kelissózder aiaqtalǵan soń Qazaqstan men Túrikmenstan elderiniń basshylary buqaralyq aqparat quraldary aldynda málimdeme jasady.
Nursultan Nazarbaev eki eldiń Premer-ministrleriniń orynbasarlary tóraǵalyq etetin Ekonomikalyq yntymaqtastyq jónindegi úkimetaralyq komissiia ekijaqty yntymaqtastyqtyń negizgi mindetterine qol jetkizý barysynda erekshe ról atqaratynyn atap ótti.
Qazaqstan Prezidenti kelissiózder barysynda taraptar sharttyq-quqyqtyq bazany jetildirýge, kásiporyndardyń eki eldegi iri infraqurylymdyq jobalarǵa qatysýyna, sondai-aq tranzit-kólik salasyndaǵy ózara is-qimylǵa nazar aýdarǵanyn atap ótti.
– «Qazaqstan – Túrikmenstan – Iran» temirjolynyń iske qosylýyn tranzittik-kóliktik ózara is-qimyl salasyndaǵy tarihi oqiǵa deýge bolady. Ózara taýar ainalymyn ulǵaitý isinde eki eldiń kásipkerleri osy artyqshylyqty paidalana bilgeni jón, – dedi Memleket basshysy.
Nursultan Nazarbaev kelissózder barysynda sý-energetika salasy jáne Araldy qutqarýǵa arnalǵan halyqaralyq qor qyzmetin jandandyrý máselesi arnaiy qozǵalǵanyna nazar aýdardy.
– Ortalyq Aziiadaǵy shekaralas ózenderdiń sý resýrstary ortaq igilik bolyp sanalatynyn taǵy da maquldadyq. Olardy ornymen paidalaný ondaǵan million adamnyń taǵdyryna áser etedi. Biyl Araldy qutqarýǵa arnalǵan halyqaralyq qorǵa tóraǵalyq etý mindeti Túrikmenstanǵa kóshti, – dedi Qazaqstan Prezidenti.
Memleket basshysy eki el prezidentteriniń kún tártibindegi halyqaralyq jáne óńirlik ózekti taqyryptardy talqylaǵanyn atap ótti.
Nursultan Nazarbaev Túrikmenstan Prezidentin Qazaqstan Respýblikasyna memlekettik saparynyń sońyna qarai birinshi dárejeli «Dostyq» ordenimen marapattady.
***
Túrikmenstan Prezidentiniń Qazaqstan Respýblikasyna memlekettik saparynyń qorytyndysy boiynsha mynadai qujattar qabyldandy:
– Qazaqstan Respýblikasy Prezidenti men Túrikmenstan Prezidentiniń birlesken málimdemesi;
– Qazaqstan Respýblikasy men Túrikmenstan arasyndaǵy Strategiialyq seriktestik týraly shart;
– Qazaqstan Respýblikasy men Túrikmenstan arasyndaǵy Qazaqstan-Túrikmenstan memlekettik shekarasyn belgileý týraly kelisim;
– Qazaqstan Respýblikasynyń Úkimeti men Túrikmenstannyń Úkimeti arasyndaǵy Qazaqstan-Túrikmenstan úkimetaralyq komissiiasy týraly kelisim;
– Qazaqstan Respýblikasynyń Úkimeti men Túrikmenstannyń Úkimeti arasyndaǵy Qupiia aqparattardy ózara saqtaý týraly kelisim;
– Qazaqstan Respýblikasy Syrtqy ister ministrligi men Túrikmenstan Syrtqy ister ministrligi arasyndaǵy 2017-2018 jyldarǵa arnalǵan yntymaqtastyq jónindegi baǵdarlama;
– Qazaqstan Respýblikasy Qarjy ministrligi men Túrikmenstan Qarjy ministrligi arasyndaǵy qylmystyq jolmen túsken kiristerdi zańdastyrýǵa (jylystatýǵa), terrorizmdi qarjylandyrýǵa qarsy kúres salasyndaǵy ózara is-qimyl týraly kelisim;
– Astana men Ashhabad arasynda baýyrlastyq bailanys ornatý týraly kelisim;
– Qazaqstan Respýblikasynyń «Atameken» ulttyq kásipkerler palatasy men Túrikmenstannyń Saýda-ónerkásip palatasy arasyndaǵy yntymaqtastyq týraly kelisim.
.jpeg)