Qasym-Jomart Toqaev pen Serdar Berdimuhamedov keńeitilgen quramda kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Shaǵyn quramdaǵy kezdesýden keiin memleketter basshylary kelissózdi resmi delegatsiia músheleriniń qatysýymen keńeitilgen quramda jalǵastyrdy.
Memleket basshysy Qasym-Jomart Toqaev Serdar Berdimuhamedovke jáne túrikmen delegatsiiasyna iltipat bildirip, elimizdiń qazaq-túrikmen arasyndaǵy ǵasyrlar boiy qalyptasqan dostyq ári tatý kórshilik qarym-qatynastyń nyǵaiýyna zor qurmetpen qaraitynyn atap ótti.
– Qazaqstan úshin bul mańyzdy oqiǵa dep sanaimyn. Sizdiń saparyńyzdyń tarihi máni zor. Sebebi biz jabyq formatta yntymaqtastyqty damytýdyń ózekti máselelerin talqyladyq. Kún tártibindegi barlyq máselelerge oń kózqaras tanytqanyńyz úshin alǵys aitamyn. Men elderimiz arasyndaǵy yntymaqtastyqtyń perspektivalaryna qatysty Sizdiń barlyq kózqarastaryńyz ben pikirlerińizge oń baǵa berdim, – dedi Prezident.
Qasym-Jomart Toqaev Serdar Berdimuhamedovtiń Astanaǵa alǵashqy memlekettik sapary Qazaqstan men Túrikmenstan arasyndaǵy diplomatiialyq qatynastyń ornaǵanyna 30 jyl tolýymen tuspa-tus kelýiniń simvoldyq máni bar ekenin atap ótti. Memleket basshysynyń aitýynsha, eki el ǵasyrlar boiy jalǵasyp kele jatqan dostyqqa, tatý kórshilik bailanysqa, ortaq mádeni jáne tarihi qundlylyqtarǵa súiene otyryp, qazirgi tańda memleketaralyq seriktestiktiń úlgisine ainalǵan irgesi berik ári úilesimdi qarym-qatynas ornatty.
– Elderimizdiń arasynda belsendi ári joǵary deńgeidegi ózara senimdi saiasi dialog jolǵa qoiylǵan. Byltyr qazan aiynda bolǵan saparymdy zor yqylaspen eske alamyn. Ashhabadta bolǵanymda barynsha qolaily jaǵdai jasap, qonaqjailylyq kórsetkenińizge rizashylyǵymdy bildiremin. Árine, munyń barlyǵy sapardyń tabysty ótýine yqpal etti, – dedi Qasym-Jomart Toqaev.
Qazaqstan Prezidenti Túrikmenstannyń eks-prezidenti Gýrbangýly Berdimuhamedovke jyly lebizi men izgi tilekterin joldady. Kelissóz barysynda saýda-ekonomikalyq bailanystar máselesi talqylandy. Taraptar birlesken kúsh-jigerdi arttyra otyryp, ózara saýda-sattyq kólemin 1 milliard dollarǵa deiin jetkizýge ýaǵdalasty.
– Mádeni-gýmanitarlyq bailanystarǵa keletin bolsaq, bul baǵytta bári josparǵa sáikes damyp keledi. Sondai-aq men Kaspii protsesi dep atalatyn yntymaqtastyǵymyz ben ózara is-áreketimizdi atap ótkim keledi. Jaqynda Ashhabadta Kaspii sammiti ótti. Jiyn oń nátijege qol jetkizý jáne túrkimen tarapynyń qonaqjailyq kórsetý turǵysynan da tabysty ótti, - dedi Memleket basshysy.
Óz kezeginde Serdar Berdimuhamedov Qasym-Jomart Toqaevqa jyly qabyldap, qonaqjailyq kórsetkeni jáne ortaq jumysqa qolaily jaǵdai jasaǵany úshin alǵys aitty.
– Men Sizge Túrikmenstannyń Milli Gengeshi Halq Maslahaty Tóraǵasy, qurmetti Gýrbangýly Mialikgýlyevich Berdimuhamedovtiń ystyq sálemin jetkizgim keledi. Qurmetti Qasym-Jomart Kemeluly, biyl Túrikmenstan men Qazaqstan Respýblikasy arasyndaǵy diplomatiialyq qarym-qatynastyń ornaǵanyna 30 jyl tolyp otyr. Osy ýaqyt aralyǵynda eki el arasyndaǵy qarym-qatynastar keń aýqymda tabysty damyp keledi. Osy sátti paidalana otyryp, sizderdi osy mereili datamen taǵy da quttyqtaǵym keledi, – dedi Túrikmenstan Prezidenti.
Serdar Berdimuhamedov qazaq-túrikmen qarym-qatynastarynyń qarqyndy damýyna kóńili tolatynyn atap ótti jáne ózara tiimdi yntymaqtastyqty odan ári nyǵaitýǵa nietti ekenin rastady.
– Meniń Qazaqstan Respýblikasyna alǵashqy memlekettik saparymdy elderimiz arasyndaǵy qarym-qatynastardaǵy eń mańyzdy oqiǵa dep sanaimyz. Onyń negizgi maqsaty – ekijaqty strategiialyq áriptestikti barlyq salada nyǵaitý. Sonymen qatar qazirgi jaǵdai men damý úrdisterin eskere otyryp, Ortalyq Aziia aimaǵynda jáne halyqaralyq arenada memleketaralyq yntymaqtastyqtyń naqty baǵdarlaryn aiqyndaý. Túrikmen-Qazaqstan saiasi dialogy, saýda-ekonomikalyq seriktestiktiń mazmuny men baǵyty keshendi sipatqa ie bolyp, kelisilgen strategiiaǵa jáne bizdiń is-áreketterimizdiń úilestirilýine jáne eń aldymen, eki halyq pen memlekettiń uzaq merzimdi múddelerine negizdelýi tiis ekenine senimdimin. Búginde elderimiz arasyndaǵy qarym-qatynas qarqyndy damyp keledi, – dedi Serdar Berdimuhamedov.
Keńeitilgen formatta ótken kelissóz barysynda taraptar ekijaqty kún tártibindegi birqatar ózekti máseleni jan-jaqty talqylap, Qazaqstan men Túrikmenstan arasynda atqarylatyn keleshek is-áreketterdiń negizgi baǵyttaryn aiqyndady.
Kelissózder qorytyndysy boiynsha mynadai qujattarǵa qol qoiyldy:
1. Qazaqstan Respýblikasynyń Prezidenti Qasym-Jomart Toqaevtyń jáne Túrikmenstan Prezidenti Serdar Berdymýhamedovtyń Birlesken málimdemesi;
2. Qazaqstan Respýblikasynyń Úkimeti men Túrikmenstan Úkimetiniń arasyndaǵy 2022 - 2024 jyldarǵa arnalǵan yntymaqtastyq jónindegi keshendi baǵdarlamasy;
3. Qazaqstan Respýblikasynyń Qarjy ministrligi men Túrikmenstannyń Qarjy jáne ekonomika ministrligi arasyndaǵy yntymaqtastyq týraly memorandým;
4. Qazaqstan Respýblikasynyń Energetika ministrligi jáne Túrikmenstannyń Energetika ministrligi arasyndaǵy túsinistik týraly memorandým;
5. Qazaqstan Respýblikasynyń Mádeniet jáne sport ministrligi men Túrikmenstannyń Mádeniet ministrligi arasyndaǵy týrizm salasyndaǵy yntymaqtastyq týraly memorandým;
6. Qazaqstan Respýblikasynyń Aýyl sharýashylyǵy ministrligi men Túrkimenstannyń Aýyl sharýashylyǵy jáne qorshaǵan ortany qorǵaý ministrligi arasyndaǵy ósimdikter karantini salasyndaǵy yntymaqtastyq boiynsha ózara túsinistik týraly memorandým;
7. Qazaqstan Respýblikasynyń Indýstriia jáne infraqurylymdyq damý ministrligi Túrikmenstannyń Ministrler Kabineti janyndaǵy Kólik kommýnikatsiialar agenttigi arasyndaǵy kóliktik-tranzittik yntymaqtastyqty damytý týraly memorandým;
8. Qazaqtan Respýblikasynyń Tsifrlyq damý, innovatsiialar jáne aeroǵarysh ónerkásibi ministrligi jáne Túrikmenstannyń Ministrler Kabineti janyndaǵy Kólik kommýnikatsiialar agenttigi arasyndaǵy ǵarysh keńistigin beibit maqsattarda zertteý jáne paidalaný salasyndaǵy ózara túsinistik týraly memorandým;
9. Qazaqstan Respýblikasynyń Indýstriia jáne infraqurylymdyq damý ministrligi jáne «Túrikmenhimiia» memlekettik kontserni arasyndaǵy himiia ónerkásibi salasynda birlesken yntymaqtastyq týraly ózara túsinistik týraly memorandým;
10. Qazaqstan Respýblikasynyń Syrtqy ister ministrligi janyndaǵy Syrtqy saiasi zertteýler institýty men Túrikmenstannyń Syrtqy ister ministrliginiń Halyqaralyq qatynastar institýtynyń Strategiialyq zertteýler ǵylymi ortalyǵy arasyndaǵy ózara túsinistik týraly memorandým;
11. Qazaqstannyń Syrtqy saýda palatasy jáne Túrikmenstannyń Saýda-ónerkásip palatasy arasyndaǵy yntymaqtastyq jónindegi ózara túsinistik týraly memorandým;
12. «Atameken» Qazaqstan Respýblikasynyń Ulttyq kásipkerler palatasy jáne Túrikmenstannyń ónerkásipshiler men kásipkerler odaǵy arasyndaǵy yntymaqtastyq týraly memorandým;
13. Qazaqstan Respýblikasynyń Ishki ister ministrligi men Túrikmenstannyń Ishki ister ministrligi arasyndaǵy Qylmystyqpen kúres salasyndaǵy nietteri týraly memorandým;
14. Abylaihan atyndaǵy Qazaq halyqaralyq qatynastar jáne álem tilderi ýniversiteti men Dovletmammet Azadi atyndaǵy Álemdik tilder túrikmen ulttyq institýty arasyndaǵy yntymaqtastyq týraly shart.
