QR Ádilet ministri Marat Beketaev túrik kompaniiasynyń Qazaqstan Respýblikasyna qarsy bergen barlyq talaptaryn qabyldamaý týraly halyqaralyq tórelik sot sheshimine pikir bildirdi, dep habarlaidy QazAqparat tilshisi.
Onyń sózine qaraǵanda, arbitrajdyq protseste taraptar mundai daýdy jabyq rejimde qaraýǵa ýaǵdalasqan.
«Biz ol jaiynda sheshim shyqqannan keiin ǵana aita alamyz. Onyń ózinde de barlyq mán-jaidy ashpaimyz. Barlyq qujat birdei jariia bolmaidy. Bul sot protsesinen arbitrajdyq daýdyń basty aiyrmashylyǵy. Biraq, túrik kásipkeri biraz jyl buryn kelgenin jáne Atyraý áýejaiyn 50/50 basqarǵanyn aita alamyz. Ekonomikamyz damyp keledi jáne Atyraý áýejaiy da damýy qajet. Osy rette taraptardyń arasynda ony damytýǵa, kiristi bólýge qatysty qarama-qaishylyq týyndady. Iaǵni, Qazaqstanǵa mol qarajat quiyp, terminal salyp, úlken qural-jabdyqtar satyp alyp, navigatsiiaǵa arnalǵan jabdyqtardy jańartyp, ushý-qoný jolaǵyn qalpyna keltirip áýejaidy damytý qajet boldy. Mundai máseleniń barlyǵy qarajatty qajet etedi», - dedi ol.
Onyń paiymynsha, qarajat quimai turyp úlken kiriske úmit artýǵa bolmaidy.
«Shamamen osy máseleler tóńiregindegi mán-jailardy anyqtaý boldy. Qorytyndysynda biz óz ustanymyzdy jaqtap shyqtyq jáne túrik kásipkeriniń barlyq talaptary qabyldanbady. Endigi ýaqytta Atyraý oblysynyń ákimdigi áýejaidy tiimdi jáne jyldam damyta alatyndyǵyna qýanyshtymyz», - dedi Marat Beketaev.
Buǵan deiin habarlaǵanymyzdai, 8 qarashada Halyqaralyq saýda palatasynyń janyndaǵy Tórelik tribýnal «Mağdenli Yer Hizmetleri ve Taşima Anonim Şirketi» túrik kompaniiasynyń Qazaqstan Respýblikasyna qarsy bergen barlyq talaptaryn qabyldamaý boiynsha sheshim shyǵardy.
