Qazaqstan Parlamenti Senatynyń tóraǵasy Máýlen Áshimbaev Tájikstan Respýblikasyna resmi saparmen bardy. Sapar aiasynda Qazaqstan Respýblikasynyń Parlamenti Senaty men Tájikstan Respýblikasy Oli Majlisiniń Milli Majlisi arasyndaǵy yntymaqtastyq jónindegi turaqty komissiianyń alǵashqy otyrysy ótti, dep habarlaidy "Ult aqparat".
Komissiia jumysy eki el Parlamentteri palatalarynyń parlamentaralyq yntymaqtastyǵyn nyǵaitýdy jáne osy baǵyttaǵy naqty isterdi qolǵa alýdy kózdeidi. Osyǵan bailanysty otyrys barysynda depýtattar birqatar perspektivalyq baǵyttarǵa nazar aýdardy. Atap aitqanda, eki el depýtattarynyń mádeni-gýmanitarlyq, saýda-ekonomikalyq jáne investitsiialyq salalardaǵy máselelerdi sheshýge yqpal etýi týraly ýaǵdalastyqqa qol jetkizildi. Sondai-aq kóshi-qon saiasaty boiynsha da ózara járdemdesý máselesi sóz boldy.
Komissiia otyrysynda Máýlen Áshimbaev Qazaqstan men Tájikstan arasyndaǵy strategiialyq serktestikti odan ári keńeitýdiń jáne nyǵaitýdyń mańyzdy ekenin aitty. Senat Tóraǵasy bul rette eki eldiń Prezidentteri – Qasym-Jomart Toqaev pen Emomali Rahmonnyń ózara qarym-qatynasy men kelisimderiniń airyqsha mánge ie ekenin atap ótti. Óz sózinde Máýlen Áshimbaev atalǵan kelissózderdi iske asyrý baǵytynda parlamentaralyq bailanysty barynsha arttyrý Parlament depýtattarynyń mindeti ekenin jetkizdi. Ol taiaýda qurylǵan Yntymaqtastyq jónindegi turaqty komissiianyń birinshi otyrysy sonyń naqty nátijesi ekenin de tilge tiek etti.
«Búgin biz Parlamentaralyq yntymaqtastyqty damytýdyń 2022-2024 jyldarǵa arnalǵan jol kartasyna qol qoidyq. Osyǵan orai aldaǵy ýaqytta bizdiń palatalardaǵy tiisti komitetterdiń delegatsiialary ózara tájiribe almasýy ekijaqty bailanysty arttyrýǵa igi áserin tigizedi. Sonyń ishinde jastar jáne saraptamalyq qurylymdar boiynsha yntymaqtastyqtyń keleshegi zor. Bul rette Senat janyndaǵy Jas sarapshylar klýby men Milli Majlis janyndaǵy Jastar Parlamenti arasynda bailanys ornatýdyń bereri mol dep esepteimiz. Odan bólek, aldaǵy ýaqytta sý resýrstaryn tiimdi paidalaný, óńirdegi qaýipsizdikti qamtamasyz etý jáne basqa da máseleler boiynsha parlamentshiler arasynda birqatar «dóńgelek ústelder» men is-sharalar ótkizýge bolady. Onyń bári ózara parlamentaralyq yntymaqtastyqty nyǵaityp, naqty nátijeni arttyra túsedi», – dedi Senat Tóraǵasy.
Resmi sapar barysynda Máýlen Áshimbaev Tájikstan Respýblikasynyń Prezidenti Emomali Rahmonmen kezdesti.
Senat Tóraǵasy Tájikstan basshysyna Qazaqstan Prezidenti Qasym-Jomart Toqaevtyń sálemi men baýyrlas eldiń halqyna igi tilegin jetkizdi. Suhbat barysynda Máýlen Áshimbaev Qazaqstanda qoǵamdyq-saiasi baǵytta júrgizilip jatqan júieli reformalarǵa da toqtalyp ótti.
«Qazaqstanda qańtar aiynda bolǵan qaiǵyly oqiǵalar elde júieli jáne eleýli ózgerister qajet ekenin kórsetip berdi. Taiaýda Qazaqstan Prezidenti Qasym-Jomart Toqaev biylǵy 5 maýsymda el Konstitýtsiiasyna ózgerister men tolyqtyrýlar engizý jóninde respýblikalyq referendým ótkizý týraly Jarlyqqa qol qoidy. Bizdiń Ata zańymyzǵa engiziletin ózgerister eldiń saiasi júiesin aitarlyqtai ózgertýdi kózdeidi», – dedi Senat Tóraǵasy.
Sonymen qatar Máýlen Áshimbaev Tájikstan Respýblikasy Oli Majlisi Milli Majlisiniń tóraǵasy Rýstami Emomalimen kelissózder júrgizdi. Kezdesýde Senat Spikeri Qazaqstan Parlamentiniń Senaty Tájikstannyń Milli Majlisimen yntymaqtastyqty odan ári arttyrýǵa múddeli ekenine taǵy bir márte nazar aýdardy. Taraptar depýtattardyń ekologiia, transshekaralyq ózenderdiń sýlaryn paidalaný jáne basqa da ortaq problemalardy birlesip sheshýge qatysty máselelerdi talqylady.
Senat Tóraǵasy Tájikstan Respýblikasy Oli Majlisi namoiandagon Majlisiniń tóraǵasy Mahmadtoir Zokirzodamen de kezdesti. Sondai-aq tájik-aýǵan shekarasynda erlikpen qaza tapqan qazaqstandyq jaýyngerlerdiń rýhyna taǵzym etip, bizdiń shekarashylarǵa arnalǵan eskertkishke gúl shoǵyn qoidy.
