Foto: Aqorda
Qasym-Jomart Toqaev pen Natasha Pirts-Mýsar eki eldiń resmi delegatsiia músheleriniń qatysýymen keńeitilgen quramda kelissóz ótkizdi, dep habarlaidy Ult.kz.
Memleket basshysy sloven delegatsiiasyna qurmet kórsetip, Qazaqstannyń Eýropadaǵy ýaqyt synynan ótken senimdi seriktesi Sloveniiamen ózara tiimdi yntymaqtastyqty damytýǵa beiil ekenin rastady.
"Sizdiń bul saparyńyz eki el arasyndaǵy ózara yntymaqtastyqqa tyń serpin berý turǵysynan óte mańyzdy. Jańa ǵana kóptegen taqyrypty, onyń ishinde halyqaralyq ahýalǵa bailanysty keibir názik máselelerdi talqylaǵan asa mazmundy kezdesý ótkizdik. Biz ekijaqty yqpaldastyqty damytýǵa nietti ekenimizdi qýattadyq. Naqty nátijelerge qol jetkizý úshin bar kúsh-jigerimizdi jumsaimyz", – dedi Qazaqstan Prezidenti.
Qasym-Jomart Toqaev ekijaqty qarym-qatynastarǵa tyń serpin beretin baǵyttardy atap ótip, Qazaqstanda Sloveniia biznesine qolaily jaǵdai jasaýǵa nietti ekenin jetkizdi. Bul úshin kásipkerlik qyzmetti retteýdiń ashyqtyǵyn qamtamasyz etý, investitsiiany qorǵaý men ekonomikany ártaraptandyrý kózdelip otyr.
Memleket basshysy Astanada ótetin Qazaqstan-Sloveniia biznes-forýmyna erekshe mán beretinin jetkizip, atalǵan jiyn eki eldiń saýda-investitsiialyq bailanysyn odan ári keńeitetinine toqtaldy.
Resmi delegatsiia músheleri tómendegidei qujattarǵa qol qoidy:
1. Qazaqstan Respýblikasy Ǵylym jáne joǵary bilim ministrligi men Sloveniia Respýblikasy Joǵary bilim, ǵylym jáne innovatsiia ministrligi arasyndaǵy bilim jáne ǵylym salasy boiynsha ózara túsinistik týraly memorandým;
2. Qazaqstan Respýblikasy Týrizm jáne sport ministrligi men Sloveniia Respýblikasy Ekonomika, týrizm jáne sport ministrligi arasyndaǵy týrizm salasy boiynsha yntymaqtastyq jónindegi ózara túsinistik týraly memorandým;
3. Qazaqstannyń Syrtqy saýda palatasy men Sloveniianyń Saýda-ónerkásip palatasy arasyndaǵy ózara túsinistik týraly memorandým.
