Búgin Qazaqstan Respýblikasynyń Parlamenti Senaty men Resei Federatsiiasy Federaldy Jinalysynyń Federatsiia Keńesi arasyndaǵy yntymaqtastyq jónindegi komissiianyń 16-otyrysy ótti. Bul týraly Senattyń baspasóz qyzmeti habarlaidy.
Is-sharaǵa atalǵan Parlament Palatalarynyń tóraǵalary Máýlen Áshimbaev pen Valentina Matvienko qatysyp, sóz sóiledi.
«Qazaqstan men Reseidiń ǵasyrlarǵa ulasqan dostyq bailanysy qazirgi tańda syndarly jáne ózara tiimdi memleketaralyq qarym-qatynastyń negizine ainaldy. Bizdiń yntymaqtastyǵymyz táýelsizdikke, aýmaqtyq tutastyqqa jáne memlekettilikke degen qurmetke negizdelgen», – dedi Komissiia otyrysyn ashqan Máýlen Áshimbaev.
Óz kezeginde Valentina Matvienko eki eldiń ózara qurmetke taban tiregen bailanysyna basa mán berdi.
«Búginge deiin bizdiń elderimiz arasynda 400-den astam sharttar men kelisimderge qol qoiylǵan. Bul memleketaralyq yntymaqtastyǵymyzdyń myzǵymas zańdy jáne quqyqtyq negizi ekeni sózsiz. Osy jumystarǵa elderimizdiń Parlamentteri de úlken úles qosty. Mundai qujattardyń basty baǵyttary memlekettilikti, egemendikti, táýelsizdikti, elderimizdiń aýmaqtyq tutastyǵyn ózara moiyndaýda jáne bir-biriniń ishki isterine aralaspaýda kórinis tabady. Bul eshqandai saiasi jaǵdaiǵa qaramastan ózgeriske ushyramaityn eń negizgi irgetas bolyp qala beredi», – dedi Resei Federatsiia Keńesiniń Tóraiymy.
Sondai-aq, ol 30 jyldyń ishinde Qazaqstan táýelsiz memleket retinde tolyq qalyptasqanyn atap ótti.
«Qazaqstan postkeńestik keńistikte damyǵan naryqtyq ekonomikasy, turaqty memlekettik institýttary, demokratiialyq basqarý júiesi jáne qos Palataly Parlamenti bar tiimdi memleketterdiń biri. Qazaqstannyń dosy ári seriktesi retinde biz sizderdiń damýdaǵy tabystaryńyz ben jetistikterińizdi árdaiym qýanyshpen qabyldaimyz», – Valentina Matvienko.
Otyrys barysynda Qazaqstan men Resei senatorlary ekijaqty kún tártibindegi birqatar ózekti máselege nazar aýdardy. Atap aitqanda, aeroǵarysh salasyndaǵy yntymaqtastyqty arttyrý perspektivalary sóz boldy. Sonyń aiasynda ǵaryshty igerý jáne «Baiqońyr» keshenin birlesip paidalaný baǵyttary boiynsha ózara is-qimyldy damytý máseleleri talqylandy.
Sondai-aq, Komissiia músheleri óńiraralyq jáne shekara mańyndaǵy bailanysty nyǵaitý tetikterine nazar aýdardy. Onyń ishinde, Qazaqstan-Resei shekarasynan ótkizý beketteriniń jumysyn jetildirý isi de bar.
Qazirgi tańda shekarada 30 ótkizý beketi jumys istep tur. Onyń 17-si kópjaqty, al, qalǵan 13-i ekijaqty. Qazaqstan tarapy júkteme men ótkizý qabiletin eskerip, 27 beketti qaita jańartý máselesin kóterdi.
Máýlen Áshimbaev mundai ótkizý pýnktteriniń tiimdi jumysy eki eldiń de azamattary men biznes ókilderi úshin mańyzdy ekenin aitty. Sol sebepti Senat Spikeri atalǵan beketterdi qaita jańartý boiynsha birlesken sharalardy jandandyrý qajettigin tilge tiek etti.
«Bul ótkizý beketteri eki eldiń de azamattary úshin asa mańyzdy. Jyl saiyn sol beketter arqyly 44 millionnan astam azamat jáne 7,5 million avtokólik ótedi. Qazirgi tańda Qazaqstan men Resei arasyndaǵy taýar ainalymynyń aitarlyqtai bóligi shekara mańyndaǵy óńirlerge tiesili. Bul – biznes ókilderi men kólik-logistika kompaniialary atalǵan ótkizý pýnktterin óte belsendi qoldanady degen sóz», – dedi Senat Tóraǵasy.
Osyǵan orai Máýlen Áshimbaev eki tarap ta shekaradaǵy ótkizý beketteriniń tiimdi ári kedergisiz jumys isteýine múddeli ekenine senim bildirdi.
Sonymen qatar depýtattar transshekaralyq ózenderdiń ekologiialyq máselelerine de airyqsha kóńil bóldi. Máýlen Áshimbaev bul máselelerdi ońtaily sheshý atalǵan ózenderdi jaǵalai qonǵan eldimekenderdiń áleýmettik-ekonomikalyq damýyna jáne jergilikti azamattardyń ómir súrý sapasyn arttyrýǵa tikelei yqpal etetinin atap ótti.
«Bul rette, birinshi kezekte, Jaiyq ózenindegi sý deńgeiiniń tómendep ketýi sóz bolyp otyr. Soǵan bailanysty óńirdegi ekologiialyq jaǵdai nasharlap ketkeni belgili. Aimaq turǵyndary úshin atalǵan ózenniń strategiialyq mańyzy zor. Aýyl sharýashylyǵynyń damýy, azyq-túlik qaýipsizdigin qamtamasyz etý osy ózenniń jaǵdaiyna tikelei bailanysty. Sondai-aq, Ertis ózenine de qatysty birqatar máseleler bar», – dedi Máýlen Áshimbaev.
Senat Tóraǵasy byltyr qabyldanǵan ekijaqty 2021-2024 jyldarǵa arnalǵan transshekaralyq Jaiyq jáne Ertis ózenderiniń ekojúiesin qalpyna keltirý baǵdarlamasy aiasynda birlesken jumystar qolǵa alynatynyna senim bildirdi.
Odan bólek, taraptar depýtattardyń belsendi ózara is-qimyly jáne tiisti atqarýshy organdarmen birlesken jumys mańyzdy ekologiialyq problemalardy tiimdi sheshýge óz áserin tigizetinin atap ótti.
