Máskeýde Qazaqstan men Reseidiń Ishki ister ministrleri – Erlan Turǵymbaev pen Vladimir Kolokoltsevtiń kezdesýi ótti, dep habarlaidy "Ult aqparat" ministrliktiń baspasóz qyzmetine silteme jasap.
Politsiia vedomstvolarynyń basshylary ekijaqty jáne kópjaqty halyqaralyq sharttar negizinde júzege asyrylatyn yntymaqtastyq baǵyttaryn talqylady.
Taraptar qylmystyq ister boiynsha quqyqtyq kómek kórsetý jáne qylmyskerlerdi izdestirý salasyndaǵy yntymaqtastyqtyń tiisti deńgeiin atap ótti.
IT–tehnologiialar salasyndaǵy ózara is-qimyldy arttyrý, internet-qylmystarǵa, onyń ishinde pandemiia jaǵdaiynda álemde keńinen taralǵan alaiaqtyqtarǵa qarsy is-qimyl máseleleri qaraldy.
Kezdesýge qatysýshylar esirtki biznesine qarsy is-qimyl, psihobelsendi zattar men sintetikalyq esirtkilerdiń jańa túrleri týraly jedel aqparat almasý salasyndaǵy isterdiń jai-kúiin talqylady.
Kóshi-qon baqylaýyn qamtamasyz etýdegi yntymaqtastyq máseleleri qozǵaldy. Karantindik shekteýler kezeńinde memlekettik shekaralardyń jabylýy jaǵdaiynda óz elderine tranzitpen oralǵan sheteldik azamattardyń jol júrýin uiymdastyrý kezindegi ózara is-qimylǵa joǵary baǵa berildi.
Taraptar avtokólik urlyǵyna qarsy qabyldanyp jatqan sharalar týraly pikir almasty. Atap aitqanda, vedomstvolardyń tiisti aqparattyq júielerin integratsiialaý máseleleri qaraldy.
Sondai-aq, Qazaqstannyń ishki ister ministri E. Turǵymbaev Reseidiń ishki ister ministri V. Kolokoltsevti qazaqstandyq politsiiany reformalaý barysymen tanystyrdy.
Kezdesý qorytyndysy boiynsha eki vedomstvo basshylary bolashaqtaǵy yntymaqtastyqty anyqtady.
