Qazaqstan men Resei arasynda talas bolyp kelgen 142 myń tonnaǵa jýyq tehnikalyq munai «Qaztransoil» kompaniiasynyń menshigine ótedi. Bul týraly búgin QR Parlamenti Senatynyń jalpy otyrysynda Energetika ministri Qanat Bozymbaev aitty, dep habarlaidy QazAqparat tilshisi.
Jalpy otyrysta ministr Qazaqstan men Resei elderiniń Úkimetteri arasyndaǵy «Týimazy - Omby - Novosibirsk-2» jáne «Omby - Pavlodar» magistraldyq munai qubyrlaryndaǵy tehnologiialyq munaidyń mártebesin aiqyndaý týraly kelisimdi ratifikatsiialaýǵa bailanysty zań jobasyn tanystyrǵan bolatyn.
«KSRO kezinde elimizdiń magistraldyq munai jelisi biryńǵai júiede bolatyn. Biraq, Keńes úkimeti taraǵannan keiin qubyrlar ár memlekettiń aýmaqtyq qaǵidaty boiynsha bólinip ketken edi. Alaida, «Týimazy - Omby - Novosibirsk-2» munai qubyrynyń Qazaqstan bóligindegi 62 048 tonna tehnologiialyq munaidyń menshik quqyǵy aiqyndalmai qalyp ketken. Sonymen qatar, «Omby - Pavlodar» munai qubyrynyń Resei ýchaskesinde 141 728 tonna tehnologiialyq munaidyń menshigi de sheshilmegen edi», - dedi zań jobasyn tanystyrǵan Qanat Bozymbaev.
Degenmen, onyń aitýynsha, atalǵan munai aýmaqtyq qaǵidatqa naqty tapsyrylmasa da Reseidiń «Transneft» JAQ-y men Qazaqstannyń «Qaztransoil» kompaniiasynyń balansyna berilgen. Iaǵni, «Omby - Pavlodar» munai qubyrynyń Resei ýchaskesindegi 141 728 tonna munai shyn máninde «Qaztransoil» AQ-nyń balasynda, al «TON-2» munai qubyrynyń Qazaqstan aýmaǵyndaǵy 62 048 munai «Transneft» JAQ qaramaǵynda bolǵan.
«Aita ketý kerek, 2017 jyldyń 9 qarashasynda jasalǵan Qazaqstan men Resei Úkimetiniń arasyndaǵy «TON-2» men «Omby - Pavlodar» magistraldyq munai qubyryndaǵy tehnologiialyq munaidyń mártebesin aiqyndaý týraly kelisim eki el arasyndaǵy kóp jyldyq yntymaqtyń nátijesi. Tehnologiialyq munaidy qaitarýda rásimderdi jeńildetý maqsatynda atalǵan kelisimmen birinshi, Qazaqstan aýmaǵynda ornalasqan «TON-2» magistraldyq munai qubyryndaǵy 62 048 tonna munai «Qaztransoil» AQ-yna tiesili. Ekinshisi, onyń ornyna Resei ýchaskesinde ornalasqan «Omby - Pavlodar» qubyryndaǵy munaidyń dál sondai 62 048 tonnasy «Transneft» JAQ-tyń enshiles kompaniiasy «Transneftýral» AQ-yna tiesili. Úshinshi, reseilik ýchaskedegi «Omby - Pavlodar» magistraldyq qubyryndaǵy munaidyń 79 880 tonnasy «Qaztransoil» kompaniiasyna tiesili bolyp bekitilgen. Sonymen qatar, kelisim kúshinen engen kúnnen bastap eki tarap on ai ishinde «Qaztransoil» AQ-yna tiesili osy 79 880 tonna munaidy «Omby - Pavlodar» qubyry arqyly Resei aýmaǵynan Qazaqstanǵa birneshe partiiamen jóneltýi qajet»,- dedi ol.
Ministrdiń atap ótýinshe, bul kelisim qubyrlardaǵy munai atalǵan uiymdarǵa tiesili ekendigin zańdy túrde aiqyndaidy. Sondai-aq, munaidy menshik ielerine tapsyrýdaǵy qajetti azamattyq-quqyqtyq jáne uiymdastyrý rásimderin jeńildetýge múmkindik berip otyr.
«QR-nyń qoldanystaǵy Salyq kodeksine sáikes munaidy tapsyrý rásimine korporativtik tabys jáne qosylǵan qun salyqtary, sonymen qatar ózge de salyqtar salynýy tiis. Alaida, kelisimniń 4 babymen «Qaztransoil» kompaniiasy atalǵan salyqtardan bosatylǵan. Sebebi bul operatsiia múlikti satyp alý mámilesi bolyp tabylmaidy. Kelisimdi ratifikatsiialaý jáne iske asyrý buryn talas bolyp kelgen 141 728 myń tonna tehnologiialyq munaiǵa «Qaztransoil» AQ-nyń zańdy ie bolýyna múmkindik beredi. Bul óz kezeginde elimizdiń ekonomikasyna qosymsha paida ákeledi»,- dedi ol.
Onyń sózine qaraǵanda, qazirgi kúni tehnologiialyq munai jer qoinaýyn paidalanýshylarǵa qaitarylmaidy. Olar atalǵan munaidy Qazaqstannyń munai óndirý zaýyttaryna jáne eksportqa jetkizýge múmkindik alady. Bul rette munaidyń kommertsiialyq ainalymynan zaýyttardy jikteýden basqa QR zańnamasyna sáikes biýdjetke tiisti tólemder tólenetin bolady.
Aita keterligi, Senat depýtattary Zańdy qoldap daýys berdi.
