QR Premer-Ministri Asqar Mamin Túrkistan oblysy Maqtaaral aýdany Myrzakent kentinde ÓR Respýblikasynyń Premer-Ministri Abdýlla Aripovpen kezdesý ótkizdi. Bul týraly primeminister.kzhabarlaidy.
Úkimet basshylary Maqtaaral aýdanynyń sý basqan aýmaqtaryn aralap kórdi, sondai-aq Jańajol aýyldyq okrýginiń Nurlyjol, Órgebas jáne Firdoýsi aýyldarynda bolyp, sý tasqyny saldaryn joiý aiasynda júrgizilip jatqan jumystarmen tanysty.
Apattyq-qutqarý jáne kezek kúttirmeitin jumystarǵa 1300-den astam adam men 220 birlik tehnika, onyń ishinde Ózbekstannan 200-den astam maman men 100-ge jýyq órt sóndirý mashinalary, ekskavatorlar, traktorlar, sý sorǵyshtar jáne basqa da tehnikalyq quraldar jumyldyryldy.
Maqtaaral aýdanynyń ákimshilik ortalyǵy Myrzakent aýylynda Qazaqstan men Ózbekstan Premer-Ministrleri jańa shaǵyn aýdannyń qurylys josparymen tanysyp, alǵashqy turǵyn úilerdiń irgetasyn qalaý rásimine qatysty jáne turǵyndarmen kezdesý ótkizdi.
Barlyǵy Myrzakent kentinde sý tasqynynyń saldarynan zardap shekken Jeńis, Jańa turmys, Dostyq eldi mekenderinen 500 otbasy úshin jeke turǵyn úiler, mektepter, balabaqsha men feldsherlik pýnktter salý josparlanǵan. Qurylys jumystaryn QR jáne ÓR mamandary birlesip júrgizetin bolady.
A. Mamin men A. Aripov Firdoýsi aýylyndaǵy qiraǵan úilerdi qalpyna keltirý jumystaryn tekserip, jergilikti halyqpen kezdesý ótkizdi.
Premer-Ministr Memleket basshysynyń tapsyrmasy boiynsha sý tasqynynan zardap shekken Túrkistan oblysy Maqtaaral aýdanynyń turǵyndary jańa nemese jóndelgen baspanamen tolyq qamtamasyz etiletinin atap ótti. Olardyń árqaisysyna respýblikalyq biýdjetten 100 myń teńgeden beriledi. Sonymen qatar iskerlik top ókilderi zardap shekkenderge demeýshilik kómek kórsetedi.
