Ótken aptada bir top qazaqstandyq delegat Koreia Respýblikasyna arnaiy saparmen baryp, tsifrlandyrý jumystaryna qatysty mańyzdy kezdesýler ótkizdi.
Ońtústik Koreia tsifrlyq tehnologiialar boiynsha álemdegi jetekshi elderdiń qatarynda. Onyń ishinde «elektrondy úkimet» jobasy boiynsha 2-shi oryndy ielenedi. Al elimiz bul kórsetkish boiynsha ázirge 33-shi orynda. Qazaqstannan barǵan ókilder óńirdegi birqatar jańashyldyqtarmen tanysyp, tájiribe almasty.
«Qazaqstan óte úlken territoriiaǵa ie. Sol sebepten aimaqtarda mamandanǵan dárigerler tapshy. Koreia Respýblikasynyń territoriiasy úlken emes. Dese de, mundai máseleler bizde de bar. Shalǵai aimaqtarda bilikti dárigerler jetispei jatady. Sondyqtan biz 5G-di qoldana otyryp, meditsinalyq kómekti halyqqa qashyqtyqtan usynyp otyrmyz», – deidi koreialyq ókil Filipp Li.
Inchhon halyqaralyq aeroportynda biylǵy jyly adamnyń túrin anyqtaityn biometriialyq tehnologiia iske qosylypty. Ondaǵy basty artyqshylyq – ushaqqa qujatsyz ári otyrǵyzý talonynsyz-aq otyra berýge bolady. Sondai-aq, atalǵan jańa júie eksport pen import úshin de yńǵaily. Olai deitinimiz, kedendik rásimderdiń jyldamdyǵyn arttyrýǵa múmkindik beredi.
«Elektrondyq úkimetti» damytý jobasy boiynsha Qazaqstan Respýblikasy men Koreia Respýblikasy seriktes elder sanalady. Tsifrlandyrýdyń jańa dáýirinde eki el tájiribe almasýdy odan ári nyǵaita túsýge tiis. Koreia Respýblikasynyń ishki ister jáne qaýipsizdik ministriniń orynbasary tsifrlandyrý baǵytyndaǵy basymdyqtardy aityp, Qazaqstanmen odan ári yntymaqtastyqqa daiyn ekendigin jetkizdi», – deidi QR Tsifrlyq damý, qorǵanys jáne aeroǵarysh ónerkásibiniń vitse-ministri Abylaihan Ospanov óziniń Facebook paraqshasynda.
Aita keteiik, atalǵan sharalar «Tsifrlyq Qazaqstan» memlekettik baǵdarlamasynyń aiasynda júzege asyrylyp jatyr. Bul baǵdarlama 2017 jyldyń 12-shi jeltoqsanynda qabyldanǵan bolatyn.
