Foto: Aqorda
Qazaqstan men Mońǵoliia prezidentteri BAQ ókilderine arnalǵan brifing ótkizdi, dep habarlaidy Ult.kz.
Memleket basshysy Mońǵoliiany aimaqtaǵy mańyzdy seriktes ári tatý kórshi retinde atap, Prezident Ýhnaagiin Hýrelsýhtyń elimizge saparyna airyqsha mán berip otyrǵanyn aitty.
– Bizdiń tarihymyz ben tamyrymyz – ortaq. Eki el de kóshpendiler órkenieti men «kiiz úiler» mádenietiniń murageri sanalady. Qos halyqtyń bolmysy men rýhani dúniesi, ómir salty men ádet-ǵurpy – úndes. Sondyqtan biz árdaiym bir-birimizge tilektes bolyp, jetistikterimizge shynaiy qýanamyz. Sońǵy jyldary Qazaqstan men Mońǵoliianyń qarym-qatynasy tyń qarqynmen damyp kele jatyr. Osydan bir jarym jyl buryn Mońǵoliiaǵa memlekettik saparmen barǵanymdy bilesizder. Qadirli Prezident Ýhnaagiin Hýrelsýh myrzanyń jáne barsha mońǵol halqynyń yqylas-iltipatyn árdaiym rizashylyqpen eske alamyn. Sol sapar barysynda Ctrategiialyq áriptestik týraly deklaratsiiaǵa qol qoidyq. Bul – myńjyldyq baýyrlastyǵymyzdy birjola bekite túsken tarihi qujat. Qazirgi tańda eki eldiń parlamentteri men quzyrly ministrlikteri tyǵyz bailanys ornatqan. Úkimetaralyq komissiia jáne Iskerlik keńes tabysty jumys istep keledi. Prezident Hýrelsýhtyń búgingi sapary osy yntymaqtastyqty nyǵaita túseri anyq, – dedi Qazaqstan Prezidenti.
Qazaqstan prezidenti elderimizdiń bilim-ǵylym salasyndaǵy yntymaqtastyǵyn nyǵaitýǵa mol múmkindik baryn atap ótti.
– Byltyr Astanada ótken «Silk Way Star» halyqaralyq vokaldyq konkýrsynda Mońǵoliianyń Mishel atty ánshisi birinshi oryn alyp, kórermenniń ystyq yqylasyna bólendi. Mundai jobalar halyqtarymyzdyń ǵasyrlar boiy qalyptasqan rýhani bailanysyn bekemdeitini sózsiz, – dedi Qazaqstan Prezidenti.
Qasym-Jomart Toqaev Qazaqstan jyl saiyn mońǵol azamattaryna bilim granttaryn bólip kele jatqanyna nazar aýdardy.
– Biz grant sanyn kóbeitip, Mońǵoliiaǵa qajetti mamandar daiyndaý isine atsalysýǵa ázirmiz. Biyl Mońǵoliiada «Study in Kazakhstan» bilim jármeńkesin ótkizý josparlanýda. Sonymen qatar biz Ulan-Batyr qalasynda Qazaqstannyń irgeli ýniversitetiniń filialyn ashýdy usyndyq. Buǵan qosa, eki eldiń qalalary arasyndaǵy baýyrlastyq qarym-qatynasty odan ári damytýǵa kelistik. Bul sharalar elderimizdiń dostyǵyn bekemdeýge, saýda-ekonomikalyq jáne mádeni-gýmanitarlyq bailanysty kúsheitýge jol ashady. Osy jumysty jalǵastyra berý mańyzdy dep sanaimyn, – dedi Memleket basshysy.
Qasym-Jomart Toqaev Mońǵoliia Prezidentiniń Qazaqstanǵa memlekettik sapary óte nátijeli ótip jatqanyn aitty.
– Qazaqstan men Mońǵoliianyń aimaqtyq jáne jahandyq deńgeidegi kóptegen ózekti másele boiynsha ustanymdary – uqsas. Erteń ótetin Ekologiialyq sammit – sonyń aiqyn kórinisi. Biz Mońǵoliiamen yntymaqtastyqty damytýǵa airyqsha kóńil bólemiz. Halyqaralyq uiymdar aiasynda biz bir-birimizge únemi qoldaý kórsetip kelemiz. Bul elderimizdiń strategiialyq seriktestigi jáne ózara seniminiń naqty kórinisi ekeni anyq. Men muny joǵary baǵalaimyn, – dedi Qazaqstan Prezidenti.
