Halyqaralyq Túrki akademiiasynda Altyn Orda memleketiniń 750 jyldyǵyna arnalǵan Mońǵoliia men Qazaqstan ókilderiniń birlesken is-sharasy ótti, – dep habarlaidy «Ult aqparat» Baq.kz portalyna silteme jasap.
Alqaly jiynǵa Qazaqstan Respýblikasy premer-ministriniń orynbasary Berdibek Saparbaev, Monǵoliia premer-ministriniń orynbasary Ólziisaihany Enhtúvshin, memleket jáne qoǵam qairatkeri Myrzatai Joldasbekov, Mońǵoliianyń Qazaqstandaǵy tótenshe jáne ókiletti elshisi Lývsangiin Battýlga, Mońǵoliianyń syrtqy ister vitse-ministri Batmónhiin Battsetseg, birqatar ǵylymi mekeme basshylary, ziialy qaýym ókilderi qatysty.
«Eki el arasyndaǵy saiasi bailanys 27 jyldan keiin jańa beleske kóterildi. Bul aldaǵy ýaqytta jan-jaqty áriptestik bailanystyń damýyna tyń serpin beredi dep oilaimyn. Al Altyn Ordanyń 750 jyldyǵyna keler bolsam, eki el ǵalymdary, tarihshylar, arnaiy mamandardyń birlese otyryp jumysty tereńdete túsedi degen senimdemin» deidi Mońǵoliia premer-ministriniń orynbasary.
Sonymen qatar, kezdesý barysynda QR premer-ministriniń orynbasary Berdibek Saparbaev Qazaqstanda Altyn Ordanyń 750 jyldyǵyna orai atqarylyp jatqan jumystarǵa toqtaldy.
«Mońǵoliia eki el tarihyna ortaq memleket. Osyǵan bailanysty biz buǵan deiin Qyrǵyzstanmen, basqa da eldermen osy jaily kelisimge kelgenbiz. Aldaǵy ýaqytta Mońǵoliia tarapy kelisimge kelse, Altyn Orda tarihyna qatysty zertteýlerdi, 750 jyldyq mereitoidy birlese atqaramyz degen senimdemin» dedi Berdibek Saparbaev.
Basqosý barysynda Altyn Orda tarihyna qatysty birneshe kitaptyń tanystyrylymy ótti.
