QR Qarjy ministrligi Memlekettik kirister komitetiniń tóraǵa orynbasarynyń mindetin atqarýshy Qýat Rahymov Qazaqstan men Qytaidyń kedendik ákimshilik málimetteri nelikten eki bólek ekenin túsindirdi, dep habarlaidy QazAqparat.
«Iá, 2017 jyly Qytai Halyq Respýblikasymen ainaly statistikanyń ara-jigi 7 mlrd dollardy quraǵan edi (kedendik ákimshilik - avt.). Biz ótken jyldyń sońynda da, osy jyly da birneshe ret Qytaiǵa baryp, áriptesterimizben kezdestik. Álbette, nelikten osynshama aiyrmashylyq baryn izdedik. Eger 7 mlrd týraly aitar bolsaq, bul soma shynynda da, óte aýqymdy san», - deidi Qýat Rahymov Ortalyq kommýnikatsiialar qyzmetinde ótken baspasóz máslihatynda.
Onyń aitýyna qaraǵanda, kezdesý barysynda QR QM Memlekettik kirister komitetiniń qyzmetkerleri qytailyq taraptyń ádistemesin bilmek bolǵan.
«Bizdiń anyqtaǵanymyzdai, olar (Qytai tarapy - avt.) Qazaqstan aýmaǵy arqyly tasymaldaityn júkterdiń bárin, iaǵni Eýroodaq elderine, Reseige, Belarýs elderine jiberiletin taýarlardyń bárine qatysty málimetterdi - Qazaqstanǵa jasalǵan eksport dep qaraidy eken. Álbette, bul rette bizde eshqandai kemshilik joq dep aityp otyrǵan joqpyn. Árine, shyndyqqa sai kelmeitin deklaratsiiaǵa, baǵany qadaǵalaý turǵysynan suraqtar. Máselen, jyl basynan beri Qazaqstan-Qytai shekarasyndaǵy taýarlarǵa mańyz berip kelemiz. Shekaradaǵy qadaǵalaý qyzmetin kúsheittik. Kóptegen júkterdi tekserip jatyrmyz. Post-keńestik aýditke qatysty suraqtar týyndaǵan 60 kompaniiany anyqtadyq», - deidi ol.
Qýat Rahymov atap ótkendei, 2019 jyldyń birinshi toqsanynda 1700 tonna taýardyń kúmándi deklaratsiialanǵany anyqtalǵan.
Eske sala ketsek, Elbasy Nursultan Nazarbaev «Nur Otan» partiiasynyń kezekti XVIII sezinde kedendik ákimshilikti qatań baqylaýǵa alýdy tapsyrǵan bolatyn.
«Máselen, kedendik ákimshilik boiynsha bizde bir málimet bar da, Qytai tarapynda odan bólek ekinshi málimet aitylyp jatady. Ol kórsetkishterdiń arasynda milliardtar jatyr. Eshkim eshteńe bilmeidi. Surasań, qaidaǵy bir bastyqtar kedendi ustap tur deidi. Olardy ustap, qylmystyq jaýapkershilikke tartyńdar. Ol jaqtaǵy jumysty retke keltire otyryp, biz birneshe júz mlrd teńge ala alamyz. Sol sekildi, basqa biýdjettik shyǵyndardy qysqartý kerek bolar. Memlekettik satylymǵa 4 trln teńge ketip jatyr. Bári de bir jerden berilýde. Osy baǵytta jumysty rettei bastap edik, qarajat túse bastady. Memlekettik satylymdy tolyǵymen básekeli ortaǵa berýimiz kerek. Qymbat ári jaisyz nysandardy qarjylandyrýdy qoiý kerek. Biýdjetti qurar kezde «jobalyq-smetalyq qujatym bar, maǵan aqsha ber», - degen bolatyn Nursultan Nazarbaev. Prezident óz sózinde Úkimet pen Qarjy ministrligine salyq ákimshiligin jaqsartý baǵytynda tapsyrma bergen edi.
