Qazaqstan Respýblikasynyń Premer-Ministri Asqar Mamin Qytaidyń Kommýnistik partiiasy Ortalyq komiteti Saiasi biýrosynyń Turaqty komitetiniń múshesi, Qytai Halyq Respýblikasynyń Memlekettik keńesi Premeriniń orynbasary Han Chjenmen kelissózder júrgizdi.
Kezdesýde ekijaqty ekonomikalyq qarym-qatynastardy damytýdyń, shekara mańy yntymaqtastyǵyn, onyń ishinde «Qorǵas» halyqaralyq shekara mańy yntymaqtastyǵy ortalyǵyn damytý arqyly da tereńdetýdiń ózekti máseleleri talqylandy.
«Nurly Jol» ekonomikalyq saiasaty men «Beldeý jáne jol» strategiiasyn qosarlaý aiasyndaǵy indýstriialyq-innovatsiialyq yntymaqtastyqqa erekshe kóńil bólindi. Barlyǵy jalpy somasy $27 mlrd-qa 55 qazaqstandyq-qytailyq joba iske asyrylatyn bolady. 2015 jyldan 2018 jyl aralyǵynda $3,8 mlrd somasyna 12 joba paidalanýǵa berildi, biyl $310 mln-ǵa 5 jobany iske qosý josparlanǵan. Olardyń ishinde kún elektr stantsiialarynyń, GES, zamanaýi et kombinaty kesheniniń qurylysy bar. $5,5 mlrd somasyna 11 joba júzege asyrylý ústinde. $18,1 mlrd teńge somasyna qalǵan jobalar boiynsha daiyndyq jumystary júrgizilip jatyr. Jalpy, jobalardy iske asyrý 20 myńǵa jýyq jańa jumys ornyn qurýǵa múmkindik beredi.
Saýda-ekonomikalyq yntymaqtastyqty odan ári ilgerletý úshin taraptar búgin Almaty qalasynda eki eldiń memlekettik organdary men biznes qurylymdarynyń 400-den astam ókilderiniń, onyń ishinde Sychýan jáne Shensi qytai provintsiialarynyń, Gýansi-Chjýan, Shyńjań-Uiǵyr avtonomdy aýdandarynyń basshylarynyń qatysýymen ótip jatqan II QR – QHR aimaqaralyq yntymaqtastyq forýmynyń mańyzdylyǵyn atap ótti. Sonymen qatar, A. Mamin qytai delegatsiiasynyń aldaǵy XII Astana ekonomikalyq forýmyna qatysýy ekijaqty yntymaqtastyqty damytýǵa zor qarqyn beretinin aitty.
Kelissózder barysynda QR Úkimetiniń basshysy kólik-logistikalyq kompetentsiialar men tranzittik dálizderdi, energetikany, ónerkásipti, agroónerkásip keshenin damytýdaǵy ózara is-qimyldy kúsheitýdiń, ásirese, qazaqstandyq aýyl sharýashylyǵy ónimderiniń eksportyn ulǵaitýdyń qajettigin atap ótti.
«Qytai – Qazaqstannyń iri syrtqy saýda seriktesi, — dedi A. Mamin. 2018 jyly QR men QHR arasyndaǵy taýar ainalymy 11,1%-ǵa ulǵaiyp, $11,7 mlrd kórsetkishine jetti. Biylǵy eki aidyń qorytyndysy boiynsha saýda-sattyq kólemi $2 mlrd qurady, bul 2018 jyldyń sáikes kezeńindegi kórsetkishten 12,1%-ǵa joǵary. — Biz osyndai oń qarqynnyń saqtalýyna múddelimiz».
