Pandemiia bastalǵannan beri qytai tarapy shekarada sanitariialyq baqylaýdyń kúsheitilgen sharalaryn engizdi jáne kólikti kún saiyn ótkizý 20 birlikke deiin qysqardy. Bul «Nur joly» ótkizý pýnkti aýmaǵynda Qazaqstannan Qytaiǵa baratyn 1700-ge deiin avtokólik kezeginiń paida bolýyna alyp keldi, dep habarlaidy "Ult aqparat" QM Memlekettik kirister komitetiniń baspasóz qyzmetine silteme jasap.
Toptalý máselesin sheshý úshin birqatar sharalar qabyldandy, sonyń ishinde qytai tarapymen kelissózder júrgizildi, olardyń nátijeleri boiynsha qabyldanatyn kólik sany kúnine 20 bastap 100-ge deiin ulǵaidy.
2020 jylǵy 1 shildeden bastap buryn ýaqytsha jabylǵan «Qaljat», «Baqty», «Maiqapshaǵai» ótkizý pýnktteri ashyldy. Alaida, qytai tarapynan ótkizý pýnktterin jabý sebebi boiynsha taýarlar men kólikti ótkizý júzege asyrylmaidy.
Úkimet deńgeiinde qytailyq tasymaldaýshylardyń kirýin jáne shekaralyq kóliktik-logistikalyq ortalyqtarǵa taýarlardy aýystyryp tieý múmkindigin kózdeitin QHR-men ótkizý pýnktteriniń ótkizý qabiletin arttyrý jónindegi is-sharalar jospary qabyldandy. Qytai júrgizýshileri endi ótkizý pýnktiniń aýmaǵyna 24 saǵatqa vizasyz rejimde kire alady.
Qytaiǵa eksportqa ónimderdi ótkizetin otandyq eksporttaýshylar úshin bir mezgilde «jasyl dáliz» quryldy. Olardy ótkizý kezekten tys júzege asyrylady.
Osylaisha, shekarada kóliktiń toptalýyn azaitýǵa baǵyttalǵan sharalar qabyldandy. Úkimettik deńgeide Qytaimen taýar ainalymyn ulǵaitý jónindegi usynystarmen Qytaidyń Memlekettik Keńesine ótinish joldandy.
Qytai tarapy taýarlardy ótkizýdiń jańa tártibin keliskennen keiin shekara arqyly ótkiziletin kólik sanynyń kúnine 200-ge deiin artýy jáne tiisinshe toptalýdyń tómendeýi kútilýde.
Alaida, aǵymdaǵy jylǵy 20 shildeden bastap Shyńjań-Uiǵyr avtonomiialyq aýdanynda koronavirýstyq infektsiianyń órshýine bailanysty Qytai Qazaqstan tapapynan kólik qabyldaýdy kúnine 10-ǵa deiin qysqartty.
Shekara arqyly birinshi kezekte tasymaldaýǵa arnalǵan kelisimsharttarǵa bailanysty Qytaiǵa taýar úshin jiberiletin eksporttyq taýarlar men tasymaldaýshylar ótkiziletin bolady.
Qazaqstan-Qytai shekarasyndaǵy temirjol ótkizý pýnktteri shtattyq rejimde jumys isteitinin jáne aǵymdaǵy jylǵy birinshi jartyjyldyq qorytyndysy boiynsha taýarlardy ákelý kóleminiń 18%-ǵa artqanyn atap ótken jón.
Osyǵan bailanysty, QR Qarjy ministrliginiń Memlekettik kirister komiteti eksporttyq-importtyq operatsiialardy júrgizý kezinde syrtqy ekonomikalyq qyzmetke qatysýshylardy logistikamen bailanysty yqtimal táýekelderdi eskerýge jáne kontragenttermen taýarlardy ótkizý jáne kelisimsharttar jasasý máselelerin aldyn ala pysyqtaýǵa shaqyrady.
