Foto: Gov.kz
2025 jylǵy 26 mamyrda Mádeniet jáne aqparat ministri Aida Balaeva Qytai Halyq Respýblikasynyń Qazaqstan Respýblikasyndaǵy Tótenshe jáne Ókiletti Elshisi Han Chýnlinmen kezdesti, dep habarlaidy Ult.kz.
Kezdesý barysynda Aida Balaeva Qazaqstan mádeni-gýmanitarlyq salada, onyń ishinde óner, kino jáne teatr, media-resýrstardy damytý baǵytynda yntymaqtastyqty nyǵaitýǵa múddeli ekenin atap ótti. Sonymen qatar ministr atalǵan baǵyttar boiynsha jetken jetistikter jaily sóz qozǵap, sonyń nátijesinde Qazaqstan men Qytai arasyndaǵy áriptestik pen ózara túsinistik jańa deńgeige kóterilgenin de tilge tiek etti.
Máselen, 2024 jyly QHR Tóraǵasy Si Tszinpinniń Qazaqstanǵa memlekettik sapary aiasynda elder arasynda Radio men televiziia salasyndaǵy yntymaqtastyq týraly memorandýmǵa qol qoiyldy.
Sondai-aq qyrkúiek aiynda Tiantszin qalasynyń mýzeiinde Qazaqstan Respýblikasynyń Ulttyq mýzeii men Qytaidyń Mádeni jádigerler ortalyǵy birlesip uiymdastyrǵan «Altyn adam jáne Uly dala» atty halyqaralyq kórmeniń saltanatty ashylýy ótti.
Kásibi óner uiymdaryn biriktirý bastamasy aiasynda Ábilhan Qasteev atyndaǵy QR Memlekettik óner mýzeii Jibek joly mýzeileri men galereialary Halyqaralyq aliansyna múshe boldy. 5 maýsym kúni mýzeide Qytai Ulttyq kórkemóner jaýharlary usynylatyn «Qytai óneriniń oi-maqsattary» kórmesi ótedi. Kórmege keskindeme, grafika jáne músin janryndaǵy 50-ge jýyq týyndy kórermen nazaryna usynylady.
Sonymen qatar, 2025 jylǵy 30 mamyrda «Astana Opera» teatrynda Qytaidyń kórnekti kompozitory ári skripkashysy Sian Sinhaidyń 120 jyldyǵyna arnalǵan kontsert uiymdastyrylady.
Al maýsym aiynyń ortasynda QR Ulttyq mýzeiinde Qytai Jibek Ulttyq mýzeiiniń qoldaýymen «Jibek jáne Jibek joly: Qytaidan Qazaqstanǵa» atty halyqaralyq kórme ótedi. Kórmede matalar kórsetilip, shai dástúrleri kópshilik nazaryna usynylady.
Ministrdiń aitýynsha, memleketaralyq yntymaqtastyqtyń basym jobalarynyń biri – mádeni ortalyqtar qurý. Bul mádeni bailanystardy nyǵaityp, tájiribe almasýǵa jáne dostyq qarym-qatynasty damytýǵa jol ashady.
QHR-dyń Tótenshe jáne Ókiletti Elshisi Han Chýnlin myrza da yntymaqtastyqty nyǵaitý qajettigin sóz etti. Atap aitqanda, Qytai aqparattyq saiasat, aýdarma isi jáne baspa salalaryn damytýǵa qyzyǵýshylyq tanytyp otyr. Sonymen qatar, Chýnlin myrza qazaqstandyq ártisterdi Qytaida ótetin festivalderge jii qatysýǵa shaqyrdy.
Otyrys barysynda qatysýshylar aqparat salasyndaǵy is-sharalar josparyn da talqylady. Naqtyraq aitqanda, BAQ yntymaqtastyq forýmy, Si Tszinpin kitabynyń tusaýkeseri, sondai-aq «Qytai – Ortalyq Aziia» aqparat agenttikteriniń forýmy jaiynda sóz boldy.
Kezdesý sońynda Aida Balaeva Qazaqstan tarapy yntymaqtastyqqa árdaiym ashyq ekenin aityp, dostyqty nyǵaitý men qarym-qatynasty damytýǵa baǵyttalǵan eki el arasyndaǵy birlesken jobalarǵa qoldaý jalǵasatynyn tilge tiek etti.
