Foto: Aqorda
Qasym-Jomart Toqaev pen Sadyr Japarovtyń tóraǵalyǵymen Qazaqstan men Qyrǵyzstan Joǵary memleketaralyq keńesiniń jetinshi otyrysy ótti, dep habarlaidy Ult.kz.
Memleket basshysy baýyrlas qyrǵyz eline shaqyrǵany úshin Sadyr Japarovqa alǵys aityp, bul resmi saparynyń maqsaty – qazaq-qyrǵyz bailanysyn nyǵaityp, ózara tiimdi yntymaqtastyqty kúsheite túsý ekenin jetkizdi.
– Biz joǵary saiasi dialogtyń arqasynda eki eldiń yqpaldastyǵyn jańa sapaly deńgeige kóteremiz. Men buǵan kámil senemin. Qasietti Alataýdyń qos qyrany siiaqty qazaq pen qyrǵyz – ejelden enshisi bir, taǵdyry ortaq aǵaiyndy halyqtar. Qiyn sátte bir-birine demeý, qýanyshty kúnde tileýles bola bilgen elder. Tarihtyń talai tezinen aman ótken dostyǵymyz – ata-babadan qalǵan amanat, urpaqtan urpaqqa berilgen rýhani qazyna. Qazir qos halyqtyń arasyndaǵy qarym-qatynas ózara senim men syilastyqqa negizdelgen berik áriptestikke ulasty. Eki eldiń bailanysy odaqtastyq rýhynda damyp keledi. Qyrǵyzstan – Qazaqstannyń aimaqtaǵy basty strategiialyq seriktesiniń biri. Ekijaqty saýda-sattyq kólemi shamamen 2 milliard dollarǵa jetti. Bul kórsetkishti eseleýge barlyq múmkindik bar. Investitsiialyq yntymaqtastyq jyldan jylǵa nyǵaia túsýde. Sonyń arqasynda túrli birlesken jobalar tabysty júzege asyryldy. Sý-energetika salasynda ózara úilesimdi jumys atqarylyp jatyr. Mádeni-gýmanitarlyq saladaǵy bailanysymyz da kúsheiip keledi, – dedi Qazaqstan Prezidenti.
Memleket basshysynyń aitýynsha, elimiz Qyrǵyzstanmen yqpaldastyqty tereńdete túsýge airyqsha kóńil bóledi.
– Byltyr Odaqtastyq qatynastardy keńeitý týraly tarihi shartqa qol qoidyq. Búgin biz Yntymaqtastyqtyń keshendi josparyn qabyldaimyz. Osy mańyzdy qadamdar qazaq-qyrǵyz bailanysyn damytýǵa tyń serpin beredi dep senemin. Eki eldiń úkimetteri bul josparda kórsetilgen maqsat-mindetterdi basshylyqqa alýǵa tiis, – dedi Qasym-Jomart Toqaev.
Qyrǵyzstan Prezidenti Qazaqstanmen dostyq, tatý kórshilik jáne bekem baýyrlastyq rýhyndaǵy qarym-qatynasty jan-jaqty nyǵaitýǵa beiil ekenin jetkizdi.
– Qazaqstan – bizdiń eń jaqyn kórshimiz, Qyrǵyzstannyń syrtqy saiasatynda erekshe oryn alatyn baýyrlas el, negizgi saýda seriktesterimizdiń biri. Qurmetti Qasym-Jomart Kemeluly, Sizdiń qoldaýyńyzdyń arqasynda memleketterimizdiń arasyndaǵy strategiialyq yntymaqtastyq pen odaqtastyq qatynastar nyq damyp kele jatqanyn airyqsha atap ótkim keledi. Bizdiń halyqtarymyz erteden dostyq pen kelisimde ómir súrdi, bir-birin qoldap otyrdy. Qalyptasqan tatýlyǵymyzdyń negizinde biz barlyq máseleni birlese sheshe alamyz dep senemin. Óitkeni qyrǵyz ben qazaq – egiz sekildi uqsas elder. Uly Abai «Esh qazaq qyrǵyz ben qazaqtyń bir tuqymdas ekenine talaspaidy» degen, – dedi Sadyr Japarov.
Otyrys barysynda saýda-ekonomikalyq, kólik-tranzittik, sý-energetikalyq jáne mádeni-gýmanitarlyq salalardaǵy yntymaqtastyq máseleleri qarastyryldy.
Jiynda Qyrǵyz Respýblikasy Ministrler keńesi tóraǵasynyń orynbasary – Sý resýrstary, aýyl sharýashylyǵy, óńdeý ónerkásibi ministri Baqyt Torobaev, Qazaqstan Respýblikasy Premer-ministriniń orynbasary – Ulttyq ekonomika ministri Serik Jumanǵarin, Qyrǵyz Respýblikasy Ekonomika jáne kommertsiia ministri Baqyt Sydyqov, Qyrǵyz Respýblikasy Kólik jáne kommýnikatsiia ministri Absattar Syrgabaev, Qyrǵyz Respýblikasy Memlekettik ulttyq qaýipsizdik komiteti Shekara qyzmetiniń direktory Abdikarim Alimbaev, Qazaqstan Respýblikasynyń Kólik ministri Nurlan Saýranbaev, Qyrǵyz Respýblikasy Energetika ministri Taalaibek Ibraev, Qazaqstan Respýblikasy Energetika ministri Erlan Aqkenjenov, Qazaqstan Respýblikasy Sý resýrstary jáne irrigatsiia ministri Nurjan Nurjigitov, Qyrǵyz Respýblikasy Mádeniet, aqparat, sport jáne jastar saiasaty ministri Mirbek Mambetaliev, Qazaqstan Respýblikasy Mádeniet jáne aqparat ministri Aida Balaeva baiandama jasady.
Qazaqstannyń Ǵylym jáne joǵary bilim ministri Saiasat Nurbek pen Qyrǵyzstannyń Ǵylym, joǵary bilim jáne innovatsiia ministri Baqtiiar Orozov Osh memlekettik ýniversiteti bazasynda L.N.Gýmilev atyndaǵy Eýraziia ulttyq ýniversitetiniń filialy ashylǵanyn málimdedi.
Kelissózder qorytyndysy boiynsha Qazaqstan men Qyrǵyzstan memleketteri basshylarynyń Birlesken málimdemesi qabyldandy.
Sonymen qatar Qasym-Jomart Toqaev pen Sadyr Japarov Qazaqstan Respýblikasy men Qyrǵyz Respýblikasy Joǵary memleketaralyq keńesi jetinshi otyrysynyń sheshimderine qol qoidy.
Resmi delegatsiia músheleri ekijaqty taýar ainalymyn 2030 jylǵa qarai 3 milliard dollarǵa deiin ulǵaitý boiynsha Jol kartasy jáne basqa da úkimetaralyq, vedomstvoaralyq qujattarmen almasty.
