Aqorda rezidentsiiasynda resmi qarsy alý rásiminen keiin memleketter basshylarynyń shaǵyn quramdaǵy kelissózderi ótti, dep habarlaidy "Ult aqparat" Aqordaǵa silteme jasap.
Qasym-Jomart Toqaev Prezident Mýn Chje Inniń alǵashqy memlekettik sapary Qazaqstan-Ońtústik Koreia arasyndaǵy saiasi dialog pen ekonomikalyq is-qimyldardyń damýyna serpin beretinin atap ótti. Qazaqstan Prezidenti kún tártibindegi barlyq máselelerge qatysty tabysty kelissózder ótip, ekijaqty tiimdi sheshimder qabyldanatynyna senim bildirdi.
– Prezident myrza, Nur-Sultan qalasyna qosh keldińiz! Biz keshe eki jaqty yntymaqtastyqtyń mańyzdy máselelerin talqyladyq. Bul Sizdiń Qazaqstan Respýblikasyna alǵashqy memlekettik saparyńyz. Keshe Siz ulttyq batyrlaryńyzdyń máiitterin Otanǵa qaitarǵan mańyzdy rásimge qatystyńyz. Osy oqiǵaǵa orai quttyqtaýymdy qabyl alyńyz, – dedi Memleket basshysy.
Prezident Mýn Chje In Qazaqstanǵa memlekettik saparmen shaqyryp, jyly qabyldaǵany úshin rizashylyǵyn bildirdi. Onyń aitýynsha, bul sapar biyl atap ótiletin Qazaqstan Respýblikasy men Koreia Respýblikasy arasyndaǵy strategiialyq áriptestiktiń 10 jyldyǵy qarsańynda erekshe mańyzǵa ie.
– Qazaqstan – Eýraziia qurlyǵynda beibitshilik ornatýǵa jáne ekonomikalyq yntymaqtastyqty keńeitýge baǵyttalǵan Koreia Respýblikasynyń «Jańa Soltústik saiasatyn» júrgizýdegi negizgi áriptesi. Meniń bul saparym ekijaqty qarym-qatynastardy ǵana emes, sonymen qatar, Koreia Respýblikasy men Ortalyq Aziia elderi arasyndaǵy kópjaqty ózara is-qimyldardy nyǵaitýǵa serpin beredi dep úmittenemin, – dedi Ońtústik Koreia Prezidenti.
Kezdesýde taraptar saiasat, saýda-ekonomikalyq, mádeni-gýmanitarlyq salalaryndaǵy ekijaqty yntymaqtastyqty, sondai-aq, eki eldiń halyqaralyq uiymdar aiasyndaǵy ózara is-qimyldaryn talqylady.
