QR Densaýlyq saqtaý ministri Aleksei Tsoi Koreia Respýblikasynyń Qazaqstandaǵy Tótenshe jáne Ókiletti Elshisi Ký Hong-sok myrzamen onlain-keńes ótkizdi. Bul jóninde vedomstvonyń baspasóz qyzmeti habarlady.
Kezdesý barysynda taraptar eki eldegi epidemiologiialyq jaǵdaidy, pandemiianyń damý erekshelikterin jáne koronavirýs juqtyrǵan patsientterge meditsinalyq kómek kórsetý, Qazaqstan men Koreianyń yntymaqtastyǵyna qatysty ózekti máselelerdi, onyń ishinde densaýlyq saqtaý, meditsinalyq bilim jáne ǵylym salasyndaǵy tájiribe men bilim almasýdy talqylady.
Korei tarapy COVID-9 qarsy kúrestegi tájiribesimen jáne infektsiialyq aýrýlardyń bolashaqta órship ketýine jol bermeý qoiý úshin densaýlyq saqtaý júiesin nyǵaitý boiynsha sharalardy bólisti.
Aleksei Tsoidyń aitýynsha, halyqaralyq yntymaqtastyq pen ózara qoldaý COVID-19 qarsy kúreste úlken mańyzǵa ie. Koreianyń koronavirýspen kúreste tájiribesi mol, sondyqtan yntymaqtastyq pandemiiaǵa bailanysty týyndaǵan birqatar problemany sheshýge, ásirese COVID-19 baqylaý isinde bilim men ozyq praktika almasýǵa kómektesedi.
Kezdesý qorytyndysy boiynsha densaýlyq saqtaý salasyndaǵy Qazaqstan-Korei yntymaqtastyǵyn odan ári damytý, atap aitqanda COVID-19 boiynsha ádisnama, jaǵdaidy boljaý, modeldeý jáne t. b. boiynsha onlain rejimde mamandardy oqytý seminarlaryn ótkizý jónindegi ýaǵdalastyqqa qol jetti.
Sondai-aq, taraptar ekijaqty yntymaqtastyqty qysqa merzimdi, orta merzimdi jáne uzaq merzimdi perspektivalarǵa strategiialyq damytý týraly sheshim qabyldady, bul sózsiz ózara tiimdi áriptestikke serpin beredi.
