Shaǵyn quramdaǵy kezdesýden keiin Qasym-Jomart Toqaev pen sheih Támim ben Hamad Ál Táni eki el delegatsiialarynyń qatysýymen keńeitilgen quramda kelissóz júrgizdi, dep habarlaidy "Ult aqparat" Aqordaǵa silteme jasap.
Taraptar saýda-ekonomikalyq, investitsiialyq jáne mádeni-gýmanitarlyq yntymaqtastyqty damytýǵa erekshe nazar aýdara otyryp, qazaq-qatar qarym-qatynasynyń jai-kúii men damý perspektivalaryn talqylady.
Qazaqstan Prezidenti Qatardyń álemdik arenada mańyzdy ról atqaratyn halyqaralyq qaýymdastyqtyń bedeldi múshesi ekenin atap ótti.
Memleketter basshylary saýda-ekonomikalyq bailanystardy nyǵaitýǵa eki jaqtyń da nietti ekenin naqtylady. Qasym-Jomart Toqaev qatarlyq kompaniialarǵa jan-jaqty qoldaý kórsetýge daiyn ekenin málimdep, olardy elimizdegi birlesken investitsiialyq jobalardy júzege asyrýǵa belsendi qatysýǵa shaqyrdy. Atap aitqanda, aýyl sharýashylyǵy, energetika, munai-himiia, taý-ken ónerkásibi, qarjy salalarynda mol múmkindikter bar ekenine toqtaldy.
Qasym-Jomart Toqaev kelesi jyly Qazaqstan men Qatar arasynda diplomatiialyq qarym-qatynastar ornaǵanyna 30 jyl tolatynyn atap ótti.
– Bul – erekshe mereili beles. Osy merzim ishinde biz tyǵyz memleketaralyq yntymaqtastyq ornattyq. Syndarly saiasi dialog qurdyq. Osynyń bári dástúrli dostyq pen berik áriptestikke negizdelgen. Astanadaǵy «Ál-Farabi» meshiti men sheih Támim atyndaǵy bilim ordasy – osynyń aiqyn kórinisi. Sondai-aq, jýyrda Almaty oblysynyń Ótegen batyr kentinde perinataldy aýrýhananyń qurylysy bastaldy. Biz Qatar Memleketiniń elimizdi kórkeitýge qosqan úlesi men jan-jaqty qoldaýyn eshqashan umytpaimyz. Bolashaqta da qazaq-qatar qatynastaryn ári qarai damytýǵa daiynbyz, – dedi Memleket basshysy.
Óz kezeginde Qatar Ámiri sheih Támim ben Hamad ál-Tani Qasym-Jomart Toqaevqa qonaqjailyq kórsetkeni úshin alǵysyn alǵys aityp, aldaǵy Respýblika kúni merekesimen quttyqtady.
Qatar Ámiri Qazaqstanmen aradaǵy jan-jaqty bailanystardy odan ári damytýǵa nietti ekenin atap ótip, ekijaqty úkimetaralyq komissiianyń jumysyn jandandyrý qajet ekenin aitty. Sondai-aq kópjaqty qurylymdar boiynsha, onyń ishinde AÓSShK aiasyndaǵy jumystardy jalǵastyrý qajet ekenin jetkizdi.
Kelissózderden keiin memleketter basshylary birqatar qujatqa qol qoidy.
1. Qazaqstan Respýblikasynyń Úkimeti men Qatar Memleketiniń Úkimeti arasyndaǵy Diplomatiialyq jáne arnaiy pasport ielerin viza talaptarynan bosatý týraly kelisimge ózgerister engizý týraly hattama;
2. Qazaqstan Respýblikasynyń Úkimeti men Qatar Memleketiniń Úkimeti arasyndaǵy Investitsiialardy yntalandyrý jáne ózara qorǵaý týraly kelisim;
3. Qazaqstan Respýblikasynyń Ǵylym jáne joǵary bilim ministrligi men Qatar Memleketiniń Bilim jáne joǵary bilim ministrliginiń arasyndaǵy joǵary bilim salasy jáne ǵylymi zertteýler boiynsha yntymaqtastyq týraly kelisim;
4. Astana qalasynyń ákimdigi men Doha qalasynyń mýnitsipaliteti arasynda baýyrlastyq qarym-qatynas ornatý týraly kelisim;
5. Qazaqstan Respýblikasynyń Saýda jáne integratsiia ministrligi men Qatar Memleketiniń Saýda jáne indýstriia ministrligi arasyndaǵy saýda salasyndaǵy ózara túsinistik týraly memorandým;
6. Qazaqstan Respýblikasynyń Úkimeti men Qatar Memleketiniń Úkimeti arasynda densaýlyq saqtaý salasyndaǵy ózara yntymaqtastyq máseleleri boiynsha ózara túsinistik týraly kelisim;
7. Qazaqstan Respýblikasynyń Aýyl sharýashylyǵy ministrligi men Qatar Memleketiniń Mýnitsipalitet ministrligi arasyndaǵy aýyl sharýashylyǵy salasy boiynsha yntymaqtastyq týraly memorandým;
8. Qazaqstan Respýblikasy Saýda jáne integratsiia ministriliginiń Metrologiia jáne standarttaý institýty men Qatar Memleketiniń Standarttaý bas uiymy arasyndaǵy ózara túsinistik jáne yntymaqtastyq týraly memorandým;
9. Qazaqstan Respýblikasynyń Mádeniet jáne sport ministrligi men Qatar Memleketiniń Sport jáne jastar ministrligi arasyndaǵy sport salasy boiynsha 2023-2025 jyldarǵa arnalǵan alǵashqy atqarýshy baǵdarlama;
10. Qazaqstan Respýblikasynyń Mádeniet jáne sport ministrligi men Qatar Memleketiniń Mádeniet ministrligi arasyndaǵy mádeniet jáne óner salasyndaǵy 2023-2025 jyldarǵa arnalǵan baǵdarlama;
11. Qazaqstan Respýblikasynyń Mádeniet jáne sport ministrligi men Qatar Memleketiniń týrizm jónindegi ulttyq keńesi arasyndaǵy týrizm salasy jáne marketing sharalary boiynsha ózara túsinistik jáne yntymaqtastyq týraly memorandým.
12. Qazaqstan Respýblikasynyń Prezidenti janyndaǵy Memlekettik basqarý akademiiasy men Qatar Memleketi Syrtqy ister ministrliginiń Diplomatiia institýty arasyndaǵy diplomattardy daiarlaý jónindegi yntymaqtastyq týraly memorandým.
