Katar Qazaqstan úshin ýaqyt synynan ótken senimdi seriktes. Bul týraly búgin Qazaqstan-Katar joǵary deńgeidegi birlesken komissiiasynyń 5-otyrysynda QR Ulttyq ekonomika ministri Rýslan Dálenov aitty, dep habarlaidy "Ult aqparat".
«Katar Memleketin Taiaý Shyǵystaǵy negizgi seriktesterdiń biri retinde qarastyramyz. Tolyqtai alǵanda, elderimizdiń arasyndaǵy diplomatiialyq qarym-qatynastyń 27 jyly ishinde ózara senimge negizdelgen syndarly dialog ornattyq. Katar Qazaqstan úshin ýaqyt synynan ótken dos ári senimdi seriktes. Katardyń Qazaqstanda áleýmettik nysandar salýdaǵy qaiyrymdylyq qalaýyna zor rizashylyqpen qaraimyz. Katar taraby Almaty oblysynda perzenthana salý úshin qarjy bólý týraly sheshim qabyldady. 2018 jyly Katar damý qorynyń qarjylai qatysýymen Nur-Sultan qalasynda mektep-litsei qurylysy sátti aiaqtaldy. Kúni keshe ǵana bul mektepke sheih Tamim ben Hamad ál-Tanidiń esimi berildi», - dedi Rýslan Dálenov.
Onyń atap ótýinshe, Qazaqstan men Katar arasyndaǵy saiasi ári investitsiialyq ózara is-qimyldyń oń qarqyny aiasynda eki eldiń bir-birimen taýar ainalymy shamamen 2 mln dollarǵa jýyqtap otyr. Aldaǵy ýaqytta bul kórsetkishti arttyra túsýge eki el de kúsh salmaq. Bul rette Doha men Nur-Sultan jáne Almaty qalalary arasynda tikelei jolaýshylar jáne júk reisteriniń osy jyldyń naýryz aiynyń sońynda ashylýy septigin tigizedi.
«Buǵan qosa, investitsiia, qarjy, energetika, aýyl sharýashylyǵy, ǵylym jáne ózge salalardaǵy yntymaqtastyqty kúsheitý ekijaqty taýar ainalymyn arttyrý úshin jańa perspektivalar men múmkinshilikterge jol ashady. Biz qazaqstandyq-katarlyq kópjosparly dialogty nyǵatýǵa jáne odan ary keńeitýge bar kúsh-jigerimizdi jumsaýǵa daiynbyz», - dedi ministr.
Otyrysqa Katar memleketiniń Saýda jáne indýstriia ministri Ali ben Ahmed ál-Kývari bastaǵan delegatsiiasy qatysty.
