Parlament Senaty Qazaqstan men Iran arasyndaǵy azamattyq ister boiynsha ózara quqyqtyq kómek týraly kelisimdi ratifikatsiialady, dep habarlaidy "Ult aqparat".
Parlament Senatynda zań jobasy boiynsha sóz sóilegen Ádilet ministri Marat Beketaev bul kelisimniń Qazaqstannyń Iranmen quqyqtyq yntymaqtastyqty damytýǵa, azamattyq ister boiynsha quqyqtyq kómek kórsetýdi retteýge, eki memlekettiń jeke jáne zańdy tulǵalarynyń quqyqtary men múddelerin qorǵaýǵa tiimdi ekijaqty tetigin qurýǵa baǵyttalǵanyn atap ótti.
«Kelisimdi jasasýdyń ózektiligi Iran aýmaǵyndaǵy Qazaqstan azamattarynyń múddelerin tolyq quqyqtyq qorǵaýdy qamtamasyz etýdiń qajettiligine negizdelgen. Kelisim eki memlekettiń jeke jáne zańdy tulǵalaryna jeke jáne múliktik quqyqtaryn qorǵaý, sotqa jáne basqa da quzyretti organdaryna júginý, tegin zań kómegin paidalaný jáne sot shyǵyndaryn azaitý quqyǵyn beredi», - dedi Marat Beketaev.
Atap aitqanda, eki el qujattar tapsyrý, dáleldemeler jinaý jáne berý, kýá men sarapshyny shaqyrý, zań aktilerin jáne tórelik sheshimderdi taný jáne oryndaý, quqyqtyq aqparat jáne materialdar almasý salasynda ózara quqyqtyq kómek kórsetetin bolady.
«Eger quqyqtyq kómekti oryndaý kelisim taraptarynyń egemendigine, qaýipsizdigine, qoǵamdyq tártibine nemese ulttyq zańnamanyń negizgi qaǵidattaryna nuqsan keltirse, olar odan bas tartýǵa quqyly. Kelisimdi júzege asyrý boiynsha ortalyq organdary: Qazaqstan úshin – Joǵarǵy Sot jáne Ádilet ministrligi, Iran úshin – Ádilet ministrligi. Jalpy búgingi kúnde Qazaqstan Respýblikasymen osyndai kelisimder 16 memleketpen jasalǵan. Zań jobasyn qabyldaý teris áleýmettik-ekonomikalyq jáne quqyqtyq saldarǵa ákep soqpaidy, sondai-aq respýblikalyq biýdjetten qosymsha qarjylyq shyǵyndardy qajet etpeidi», - dedi ol.
