Qazaqstan Premer-Ministri Álihan Smaiylov elimizge resmi saparmen kelgen Grýziia Premer-Ministri Iraklii Garibashvilimen kelissóz júrgizdi, dep habarlaidy "Ult aqparat" primeminister.kz saityna silteme jasap.
Kezdesý barysynda taraptar saýda-ekonomikalyq yntymaqtastyq, ózara investitsiialar men biznes-bailanystardy keńeitý, eki eldiń týristik áleýetin damytý, jańa áýe reisterin ashý, sondai-aq mádeni-gýmanitarlyq saladaǵy ózara is-qimyl máselelerin talqylady.
Álihan Smaiylov qazirgi ýaqytta birlesken kúsh-jigerdiń arqasynda ózara taýar ainalymynyń rekordtyq kórsetkishterge jetkenin atap ótti. Taýar ainalymy $31,7 mln-nan $147,7 mln-ǵa deiin ósti, bul ótken jyldyń uqsas kezeńimen salystarǵanda 4,7 ese kóp.
«Oń dinamikany saqtaý úshin bizde barlyq múmkindikter men quraldar bar. Búgin qol qoiylǵan Ózara taýar ainalymynyń nomenklatýrasyn keńeitý jónindegi 2023-2026 jyldarǵa arnalǵan jol kartasy eki el arasyndaǵy saýdaǵa qosymsha serpin beretinine senimdimin», — dedi QR Premer-Ministri.
Óz kezeginde Iraklii Garibashvili Qazaqstan men Grýziianyń azyq-túlik qaýipsizdigi men júk tasymaldaýdy qosa alǵanda, kóptegen salada yntymaqtastyqty keńeitý boiynsha áleýeti zor ekenin atap ótti.
«Eki el arasynda saýda, investitsiialyq jáne biznes-yntymaqtastyq qarqyndy damyp keledi. Birlesken jobalar aiasynda tabysty kooperatsiianyń kóptegen mysaldary bar. Sonymen birge biz eki el ekonomikasyn damytý úshin odan da kóp jumys jasai alamyz. Sondyqtan jańa múmkindikter men ózara tiimdi baǵyttardy qarastyrý qajet», — dedi Iraklii Garibashvili.
Kezdesýde taraptar Transkaspii halyqaralyq kólik baǵdaryn (THKB) damytý máselelerin de talqylady.
Onyń básekege qabilettiligin arttyrý úshin temirjol ýchaskeleri men teńiz porttaryndaǵy infraqurylymdyq shekteýlerdi alyp tastaý, sondai-aq qoldanystaǵy tarifterdi qaita qaraý qajettigi atap ótildi.
«Bul joba eki el úshin strategiialyq mańyzǵa ie. Qazaqstan taraptar múddeleriniń teńgerimin saqtai otyryp, óńirdiń kólik-tranzit áleýetin damytý jónindegi barlyq bastamalardy qoldaidy. Jalpy THKB áleýetin arttyrý úshin basqa qatysýshylarmen birge «tar» tustaryn sinhrondy joiý jáne onyń áleýetin damytý boiynsha 2022-2025 jyldarǵa arnalǵan jol kartasyn ázirleýdi usynamyz», — dedi Álihan Smaiylov.
Sonymen qatar QR Premer-Ministri eki el arasyndaǵy týristik áleýetti, onyń ishinde eko- jáne etno-týrizm turǵysynan damytýdyń mańyzdylyǵyn erekshe atap ótti.
Búgingi tańda Qazaqstan Grýziiaǵa 34 tikelei áýe reisin júzege asyrady. Bul oraida Qazaqstannyń 12 áýejaiynda sheteldik áýe kompaniialary úshin ashyq aspan rejimi engizildi. Onyń aiasynda reister sany boiynsha barlyq shekteýdi alyp tastaý kózdelgen.
Kezdesý qorytyndysy boiynsha taraptar birqatar ekijaqty qujattarǵa qol qoidy: Qazaqstan men Grýziia arasyndaǵy ózara taýar ainalymynyń nomenklatýrasyn keńeitý jónindegi 2023-2026 jyldarǵa arnalǵan jol kartasy, Qazaqstannyń Tsifrlyq damý, innovatsiialar jáne aeroǵarysh ónerkásibi ministrligi men Grýziianyń Ekonomika jáne turaqty damý ministrligi arasyndaǵy yntymaqtastyq memorandýmy, sondai-aq «Qazaqstan temir joly» UK» AQ men «Grýziia temir joly» AQ arasyndaǵy yntymaqtastyq týraly memorandým.
